mardi 27 novembre 2012

#لن_نصالح

المنصف العجيمي، كمال لطيّف، كمال مرجان، برهان بسيّس، سليم شيبوب و القائمة تطول، الأسماء هذي الكل و غيرها من الأسماء الي ما نستحضرهاش حاليا، الكلها وجوه ظهرت و طلعت على قنوات تلفزية و إذاعات! في حين أنّو مكانها الطبيعي هو السّجون !

الكلها حكات و برّأت ذممها و قالت : أنا لست منخرطة في "منظومة فساد" !
الكلها "اعترفت" أنو شاركت سابقا لكن مشاركات "خفيفة" !
الكلها اعترفت أنو ربّما قد أخطأت !!
و الأخطر من هذا الكل أنّها اعتذرت ! إي نعم اعتذرت و كلّها أمل أنّو الشّعب باش يسامحها و يقبل اعتذارها !

شخصيّات لها من القدرة و البلاغة و الفصاحة (بحكم الخبرة) على الإقناع و كسب تعاطف المتفرّج، الكثير ! الشيء الذي يجعل الشّخص البسيط، إلي ما عندو كان التلفزة و الإذاعة يستقي منها الأخبار، لوهلة يصدّق ما يــُـــقال !

إعلام العار و العار أبسط صفة انجموا ننسبوها إلى هذا الإعلام طلع أخطر بكثيــــــــــــــــــــــــــر ممّا نظن !!
هذا الإعلام يعتمد طريقة خبيثة في التعامل مع الشخصيات التي كان لها يد في النظام السابق، بحيث يحاول تنظيفها و تلميعها و إخراجها بصورة المخطئ الذي يعتذر و يطلب الصّفح من الشعب !! و كل هذا يسري فينا مفعوله كما يسري ذلك السمّ في أبداننا، أما سم بطيئ المفعول، ما يعطيش نتيجة في وقتها و إنّما بعد مدّة !

لذلك وقت إلي بدات ظاهرة "تبييض الماضي" كانت ردّات فعلنا عنيفة في البداية ثمّ بدات تفتر شيئا فشيئا :

المرة الأولى كنت تتصدم و تستنكر و تصرخ
المرة الثانية تستنكر و تصرخ
المرة الثالثة تستنكر
ثم بعد ذلك تندهش 
المرة الي بعدها تقاطع البرنامج أو القناة 
المرة اللي بعدها تحبّ تتفرّج من باب الفضول حتى تكتشف شنوة في الحوار 
و في المرحلة الأخيرة، تصبح الشخصية الفاسدة التابعة لأزلام النظام البائد مصدر للتنبير فقط !! 

الإعلام هذا استغل عاطفة الشعب و تعطّشه إلى معرفة التفاصيل الي صارت أيّام الثورة ! 
شئنا أم أبينا حقيقة ما صار تلك الايام لا يملكها إلا أمثال شيبوب و غيره ! لذلك تلقى الشعب الكل يستنّى في الحوارات من هذا النوع لا لشيء، إلا باش يلقاشي معلومة مفيدة أو حكاية يرويها "البطل" في خصوص ما حدث تلك الايّام !!!

ما يصير اليوم على بلاتوات القناوات و البرامج الحوارية المباشرة هو مصيبة كبيرة و جريمة خطيرة تــُـــرتــَــكب في حقنا نحن كشعب تونسي قام بثورة ! 
سياسة "تعويد" المتفرّج على هذه الوجوه حتّى تصبح شيئا عاديا في أذهاننا !!

ما صار الليلة و مازال باش يصير، هو محاولة لقتل آخر عرق حي في ثورتنا، التي كانت في يوم ما ثورة مــُـــباركة ..


#لن_نصالح



jeudi 18 octobre 2012

اسمع يلّي ما سمعتش ..


اسمع يلّي ما سمعتش : تسجيل صوتي - للسيّد حمادي الجبالي و للباجي قايد السبسي - مسرّب !!
فيديو اجتاح الفايسبوك في أقل من ساعة، الناس الكل حكات عليه و فرّغت طاقاتها السلبية و الإيجابية، إلي بدى يدافع و إلي يهاجم و إلي يسب و إلي يمجّد و و و !!

الحاصيلو ضجّة كبيرة، صحيح في البداية عندها أسبابها لكن بمرور الوقت و بهدوء الأعصاب، و مبعد ما الواحد سمعو أكثر من 3 و 4 مرّات، برشة أراء و ردّات فعل اختلفت ..

فيديو الناس الكل تفجعت منّو خاطر لم نعهد بفيديوات مسرّبة لكبار شخصيّات، و لسياسيّين و لوزراء، خاصّة إذا كانوا في الحكم !! أحداث جديدة أول مرّة نعيشوها.. 

شخصيّا تفجعت أوّل ما ريت العنوان : حوار مغلق بين حمّادي الجبالي و الباجي قايد السبسي ! قلت كيف يجتمع رئيس حكومة بخائن و قائد لثورة مضادّة !!
استمعت للفيديو، و لوهلة أحسست و كأنّها خيانة لثورتنا التي استأمنّا عليها وزراءنا (نسيت كل ما كان من تقصير للحكومة و الحاجة الوحيدة الي خممت فيها أنو السيد حمادي الجبالي يتواصل مع الباجي تحت الطاولة)، لكن مبعد اكتشفت إلي الحوار مسجّل منذ ديسمبر 2011، أي منذ وقت تسليم الباجي للسلطة لرئيس الحكومة الحالي، حينها بدرت إلى ذهني العديد من الأسئلة: 

 كيفاش تسجّل الحوار ؟ و متى ؟ هل بعلم من الباجي فقط ؟ هل بعلم من الجبالي و السبسي؟ هل بدون علم السبسي؟ 
كيفاش يخرج حوار مغلق إلى العلن بعد عام تقريبا ؟ كيفاش يخرج حوار مغلق من أصلو ؟؟ شكون خان الأمانة إذا كان هو فعلا مغلق ؟؟ 

بكري شوية كي حكيت في الجزئيات هذه، جاو قالولي شبيك تحكي في القشور و سيّبت و اللب !! يعني الجوسسة و المعاملات الي من النوع هذا أصبحت قشور .. و لذلك سأتجاوز ما أسماه البعض قشور، و نتعدّاو إلى اللب و الجوهر ألا وهو محتوى الحوار : 

الحوار ما فيه شي يــُــعاب عليه رئيس الحكومة، ما فيه شي ضد رئيس الحكومة، في وقت تسليم السلطة عادي جدّا أنّو يتم تواصل بين الإثنين الوزيرين القديم و الجديد، أولا لقلة خبرة الجبالي و ثانيا بروتوكولات معمول بها و عاديّة..
نصائح طلبها الجبالي من السبسي في فترة حساسة جدا و مرحلة انتقالية ما فيها حتّى عيب !!
لمن سيتّهمني بالتبرير، نقلّو ارتاح، إلي يعرفني يعرف إني ما نبرّرش، لكن الموقف واضح و النيّة المبيّتة واضحة ..

الفيديو إذا كان باش يضر راهو باش يضر الباجي، هو صرفاق للبجابيج فقط لا غير، كل المواقف الي دافعو عليها جماعتو طيّحها الباجي في الماء، تبلّت و شربو أيتامو ماءه :)
الباجي حكى على القروي و إلي قال أنّو مدعوم من برّة و اعترف أنو قضية نسمة ممكن تعمل مشكلة و لذلك يجب امتصاص "الغضب"
مجّد في قطر و في أمير قطر و في الكويت و الإمارات و قال إلي علاقاتنا بيها طيّبة، كذلك مجّد في الخليجيين بصفة عامّة ..
حكى على قضيّة البغدادي و اقترح على الجبالي تسليمو الذي كان خائف كثيرا على حرمة البغدادي الجسدية، في حين أنو جماعة الباجي ندبوهم نهار الي تم تسليمو فعليّا و قالو لا يجوز، و خيانة و مانعرش شنوة..

حكى الباجي في مواضيع وضعت البجابيج في موقف محرج.. مواضيع لم أرها قد مسّت من شخص الجبالي، ما عدى موضوع واحد وحيد حزّ في نفسي ألا و هو حديثهم على السيّد منصف بن سالم و تلك الطريقة السيّئة التي تم بها تداول الموضوع ..

النّاس الي قالت أني نحكي في القشور نقلّها هذا رأيي بخصوص الفيديو، فهاتوا ما عندكم ..

هذا التسجيل لا يمكن أن يتعدّى حدود السياسة و تقاليد تسليم السلطة من حكومة لأخرى، خاصّة باعتماد مبدأ "استمرارية الدّولة"، لم أر أي خيانة في ما قيل في الفيديو ..

تسريب الفيديو في هذه الفترة  التي قاطعت فيها النهضة نداء التجمّع بقيادة الباجي، له أسبابه، أهمّها إظهار الحركة بمظهر المنافق الذي يقاطع فيه العدو علنا و يتحالف معه سرّا، أساليب حقيرة لن تنطلي علينا، ننتظر منها المزيد أكيد، فهدفهم الوحيد هو الكراسي و لن يهنأ لهم بال قبل أن ينتصروا في معركتهم، لكن هيهات ..

بي إس : قد يكون هذا الفيديو (عن غير قصد) بمثابة إنذار لأي خائن يريد التحالف مع نداء تونس .. فلن يحكم فينا خائن مهما طال الزمان أو قصر ..




mercredi 17 octobre 2012

محاولة إحياء فاشلة ..

كل ما نتفكر إلي المجرمين و السفاحين إلي قتّلو و شرّدو العباد، إلي خذاو من حقّ الشّعب و عيّشوه في حالة تشرّد لسنوات و سنوات، سرّاق عاثوا في الدنيا فسادا و نهبوا ثروات الشعب المعنوية قبل المادية، الناس الي نورمالمون بلاصتهم الحبوسات، كل ما نتفكرهم قلبي يوجعني ..

كل ما نتفكر إلي هوما قاعدين يحاولو باش يقودو البلاد، و قاعدين يحكيو باسم الثورة و عاملين فيها ثورجيين، يحبو يقنعونا ببياض ملفّاتهم و بقطعهم مع الماضي، نساو إلي أحنا نراو فيهم ماضينا الأليم، كل ما نتفكرهم قلبي يوجعني ..

نساو إلي حضورهم في الإجتماعات و رؤيتهم في التلافز يوميا يفكّرنا بعهد خلى، ماشي في بالهم الي العهد هذا ينجم يرجع، لكنّه عهد مضى و لن يعود إلا على جثثنا ..
في بالهم كيف يكوّنوا أحزاب عاملة روحها تحكي باسم الثورة، باش نصدّقوهم و نعطيوهم الفرصة و نصفّقولهم و نراو فيهم روح البطولة، و نساو إلّي المؤمن لا يلدغ من جحر مرتين.. 

إلي كان يوما ما عدوّا و قاتلا و سفّاحا و مجرما مستحيل يكون اليوم وصي عليّا، مستحيل نأمّنوا على مستقبل أطفالنا .. خاطر الخائن و العميل، الخيانة بالنسبة ليه أصبحت قوت يومي، الخيانة و الطمع و الجشع هي مبادؤه إلّي تربّى عليها مستحيل يبدّلها في ليلة و نهار ..
أولئك الذين كانوا يحسبون أنفسهم أسيادا، وقت الي كانوا مستقويين بكبيرهم الظّالم و يلعقولوا في الصبّاط، اليوم نراووهم في محاولة فاشلة لمواصلة دورهم المزعوم في السّيادة، خاصّة و أنّو سيّدهم خلاهالهم واسعة و عريضة .. 
و إلي يحيّر أكثر أنّو بعض مناضلي الأمس، إلي كانت كل الناس تغزرلهم بعين كبير، مناضلو الأمس إلّي كانو ضحايا هالفئة إلي نحكي عليها، اليوم تحط يدّها في أياديهم، و تحاول "بناء" المجتمع معاهم !!

مناضل الأمس إلّي كان مضطهد و مظلوم و إلي تعذّب من تصرّفات المجرمين، نلقاه اليوم باع دمه و قضيّته بثمن بخس !! بل أنّو أعطى كرامته مقابلا لهذا التّحالف !!!!

محاولة فاشلة لضخّ الدّماء في جسد التجمّع، بالضّبط كمحاولة لإنقاذ ميّت بل و متعفّن .. 
هي محاولات في نظرهم مشروعة طالما أنّه لا يوجد من يقف لهم و يوعّيهم بأنّ "تجمّعهمم" ميّت متعفّن ..



jeudi 4 octobre 2012

فضيحة الإغتصاب ..


 مازاللنا كان قليلة تربية باش يستقبلها الرئيس في قصرو !!

عشنا وشفنا، أصبحت صاحبة الأخلاق المنحطّة تستقبل في القصور و "تـُـكرّم" !! 
ممكن يكونوا غلطوا أعوان الأمن، موش ممكن بل أكيد غلطوا، لكن غلطتهم هذه خذات منحى آخر من قبل "المجتمع المدني" و أصبح من الواجب "التعاطف" معها !!

القضية حسب رأيي و غير النّاس الكل أقول، أنّو وصلو بيها الجماعة لهدفهم، و هو التعاطف مع الفتاة رغم أنّها غالطة !!
الطفلة في أنصاف الليالي و في مكان خالي، و مبعد يقلك مسكينة !!
طفلة في الليالي مع شاب غريب (و إن كان خطيبها) من الممكن أنها باش تتعرّض لمحاولة هجوم من أي بشر كان، يعني موش غريبة الحكاية !!

قضيّة أو بالأحرى فضيحة عملتها الطفلة، و كمّلوها جماعة "الإسبري بطحة" ..
شكون الطفلة الي عندها كرامة تقبل على روحها فضيحة كيما هذه ؟؟ 
"مغتصبات الحقوق" فعلا هوما الفتيات الي تم اغتصابهنّ و ساكتين على حقوقهن، لا لشيء إلا لأنهم خايفين من الفضايح الي تنجم تصير، و الي صار مع هذه الفتاة خير دليل (و لو أنّها ظاهرة صوتية) ..

قضيّة أصبحت على كل سيرة و على كل لسان، شكون ما حكاش في قضيّة الإغتصاب، شكون ما حكاش في تفاصيل التفاصيل ؟؟ شكون ما سمعش بالحكاية ؟؟ صغار كبار نساء رجال !! 
ثقافة منحطّة منحلّة دخّلوها إلى البيوت و إلى العقول بطريقة غير مباشرة لكنّها نااااااااجحة و بدات تعطي أكلها !
نحكي على روحي، هذه المواضيع لم تكن يوما مطروحة في منزلنا بهذه الوقاحة، اليوم العايلة الكل تقريبا ولات تتناقش فيها !! و لو بـ "الإشارات" !

نتألم كثيرا كيف نسمع ناس تقول : هي و خطيبها فين المشكلة ؟؟ اليوم ولاّ اختلاء الشاب بفتاة ما فيهش مشكلة ؟؟؟
اليوم أصبح من العادي أنو نراو قلّة التربية و انحطاط الأخلاق في الشارع ؟؟؟
على الأقل سابقا الموضوع ماكانش مطروح، و الي يغلط يغلط على روحو، و ما نسمعوش رأي العباد في ذلك النوع من الحوادث و الوقائع !
اليوم كي خذينا حريتنا في التعبير ولينا نعبرو و ندافعو على فساد الأخلاق، و على قلّة التربية ؟؟
هذه الحرية الي دافعوا الأحرار عليها و دفعوا أرواحهم فداء لهم ؟؟

زعمة الشهيد الي سقط في الثورة كان يرضى أنو يرى أختو أو حتى يسمع بيها فقط و هي في وضعية لا أخلاقية ؟؟؟

هذه حرية التعبير ؟؟؟؟؟؟ 

الي باش ينعتني بالمعقدة فليفعل، فإن كان انفتاحي مرتبط بفساد الأخلاق و انحطاط المستويات، فأنا أعترف أني أكبر معقدة ..

تحيّاتي ..



mardi 11 septembre 2012

مستعمرون داخليّون ..

منذ البارحة و خبر الفيلم المسيء للرسول منتشر و لا حد حب يتكلّم أو على الأقل "يستنكر" و اليوم دوب ما تمّ الإعتداء على مجموعة صور لحبيب بورقيبة في متحفه، قامت الدنيا و ولاّت مظاهرة أو مسيرة لنصرة "إلههم" بورقيبة، نصرة معبودهم، نصرة رمز من رموز أعداء الإسلام ..

يعتبرون بورقيبة خط أحمر، دفاعهم عليه فاق كل تصوّر !
عندهم قدرة على فدائه بأرواحهم و باستماتة غريبة فعلا أحسدهم عليها !! ماذا لو دافعتم على الإثنين معا ؟؟ دافعوا على زعيمكم و دافعوا على رسولنا !! استنكروا الأمرين !! لكن لا تحسّسونا أنّنا أقلية مسلمة في بلدنا !!

ما ريتهم زعام كان في تحضير اللافتات و في التفنّن فيها، على الخبر تسمع حسّهم، فيسع ما يدوروا و تلقى لافتاتهم و شعاراتهم جاهزة !!

نفاق يتطاير من أعينهم، و سرعة كبيرة في الركوب على الأحداث و استغلالها لصالحهم، ما يفلتوش مناسبة إلا و يسجّلوا حضورهم حتى و إن كانوا كعبتين.. و والله لو كان في شتم بورقيبة مصلحتهم لفعلوا، لكن طبعا ليس لهم بذلك مصلحة ..

ذلك هو حال معارضتنا : فاشلة و حمقاء، لو كانت عنا معارضة "حقيقيّة" لكان حالنا الآن أفضل بكثير ممّا نحن عليه .. 
لكن معارضتنا محترفة التّهريج بامتياز، الواحد عدّو باش يكوّن معارضة داخل الترويكا حتّى يحفّز الحكومة على العمل و "أشباه معارضتنا" يضربوا في النّوم، ما يعرفوا كان ينبّروا و يحطّوا العصا في العجلة ..

برشة ناس، و في رواية أخرى مناضلين، طاحت من عينيّا، كنت نغزرلهم سابقا بعين الإكبار، لكن الثورة أسقطت أقنعتهم و ظهر كل واحد و معدنه و قد علا طرق الحديد تفوح منه رائحة الصّدأ، و لمع الذهب من زوايا أخر ..

معارضة كرتونيّة، أو ربّما مستعمر داخلي كل همّه نيل نصيب من "بلده" تحت أي ظرف من الظّروف و مهما كانت الطّرق ..

لن أمنحكم شرف لقب المعارضة.. بل أنتم "مستعمرون داخليّون" و سنقاومكم بكل ما أوتينا من جهد .. سنكون حاجزا بينكم و بين بلادنا، لن تمرّوا إلاّ على جثثنا ..



vendredi 17 août 2012

يتوحدون على الباطل و نفترق على الحق !!


كالعادة و بعد راحة دامت تقريبا شهر من مسلسل السلفية، تعود البارحة هذه السلسلة لكن بأكثر تشويق، بعد اعتداء السلفيين على الحضور في مهرجان الأقصى ببنزرت ..

و ما إن انتشر هذا الخبر حتى كثرت "الكرتوش" هنا و هناك .. أطراف تتشاتم و تتقاذف السباب و الشتائم و المشكلة أنها أطراف تنسب نفسها إلى الإسلاميين !! و بالطبع يجد المحايد نفسه "ملطشة" من هذا الطرف و من ذاك :/

الطرف الأوّل :
مع التّعنيف و مؤيّد له بشكل غريب، ذلك أن سمير قنطار مؤيّد لبشّار النعجة و بالتالي فإن كل "لكمة" لهذا الشخص هي لكمة "حلاااااااااااااااااااال" !
بل أن العديد منهم من قضّى الليلة يحتفل على حائطه الفايسبوكي بتلك الأحداث و قد وجد للعنف ألف مبرّر !!

الطّرف الثّاني :
يستنكر و يشتم و يرمي التّهم جزافا و ينعت "السلفيين" بأبشع النّعوت و أبشع الأوصاف، حتّى أنّ بعضهم أيضا قضّى ليلة سوداء و هو يضع النشرية تلو الأخرى يشتم فيها هذا و يسب فيها ذاك..
و هذا الطرف منقسم إلى شقين : شق مساند لبشّار (و بالتالي مساند لسمير قنطار)، و شق معارض له (معارض لسمير قنطار) ..

الطّرف الثّالث :
محايد يجد نفسه مجبرا على تهدئة هذا و توعية الآخر فـ "ياكل على راسو ما ياكل الطبل نهار العيد" :/

و الحقيقة أن للطّرفين الأوّل و الثّاني جرعة زائدة من الغباء، إي نعم الغباء !!

أوّلا نحن لسنا في غابة، نحن دولة قانون (مهما بلغت ثغراته ما بلغت) شئنا أم أبينا !!
و دولة القانون تمنع منعا باتّا مثل هذه الأعمال و الأحداث التي تعطي للمستمع و الناظر إلى هذه الحوادث انطباعا سيّئا، يفيد بأنّ لكل طالب حق، الحق في أخذه بيده مهما كانت الطريقة و مهما بلغ عنفها ما بلغ !!
رغم الموقف الصحيح الذي تملكه هذه الفئة و المتمثّل في : الغيرة على سوريا و محاولة طرد كل من تسوّل له نفسه أن ينادي بحياة بشّار في بلد الثّورة تونس، لكن للأسف سوء التّقدير و سوء التصرّف جعل هذه الفئة في موقف ضعف، فلا يمكن أن يكون العنف حلاّ مهما كانت المواقف صائبة ..

ثانيا لا أرى بدّا من ردّة فعل الطّرف الثاني و التي أراها مبالغا فيها، قد لا يكون الهدف منها سوى ضرب السلفية في العمق، بعد أعمال العنف التي انتشرت هذه الأيام و التي نسبت إلى السلفيين..
فكيف نضع البنزين قرب النار و نتعجّب حين نرى البنزين ملتهبا ؟؟
كيف لك أن تسمح و في مثل هذه الفترة، و نحن نرى سوريا تــُــقــَـــتّــَـــلُ تقتيلا و شهداؤها يــُــهّـَـرّبُون ليتِمّ إكرامهم بالدّفن، باستضافة من يردّد يحيا بشّار و "يفتي" بقطع ألسنة كل من يساند الثّورة السّورية ؟؟
ماكفاناش التّوانسة الشبّيحة نعانيو منهم، تزيدوا تجيبولنا شبّيحة من الخارج ؟؟

بالنسبة لي أعتبرها حادثة كشفت عن ازدواج في شخصيات البعض :/
فلا نستطيع تبرير العنف بأي حال من الأحوال، مهما كانت المواقف و الأفكار صحيحة، كما أنّنا لا نستطيع أيضا أن نستفزّ شعبا بأكمله ثمّ نلومه بعد ذلك على ردّة فعله !!

إخوتي .. اتّخذوا الحيادية في تعاملكم و حاولوا أن تكون حرفيّين، على الأقل أمام ما نعانيه من غياب كلّي للمعلومة على إعلامنا "اللاوطني" ..
أرجو أن لا ننساق وراء خطط (لا أريد لفظ المؤامرة) تــُـــحاك لنا لتفكيك وحدتنا، و نحن الذين تجمعنا "لا إله إلاّ الله سيّدنا محمّدا رسول الله" ..
ها نحن نتفرّق في حين أنّ عدوّنا يتجمّع و يتّحد حول الباطل ..

يحز في نفسي أن أرى بعض "النقاشات البيزنطيّة" تــُـــدار بين إسلاميّين : هذا مع السلفيين و الآخر ضدّهم، فلا الأوّل يوضّح ما صار و لا الثّاني يقبل النّقاش .. :(

اتفق العرب على ألا يتفقوا ..



اتفق العرب على ألا يتفقوا ..

حملات على كل شكل و لون تجتاح الفايسبوك ! و الكلها ولات تطالب بالضغط على الحكومة و بمطالب ثوريّة !؟

ألم يكن من الأجدر الانضمام إلي حملة #اكبس حتى تتكاثف الجهود و يكون الضغط أكبر على الحكومة ؟؟ 
لماذا تقسيم القوات، و تشتيت الجهود إذا كان هدف هذه الصفحات "المعارضة" فعلا مصلحة الوطن ؟؟؟ بغض النظر عن كل التحزبات ؟؟؟
خاصة و أن مطالب الحملتين هي نفس المطالب !

علاش نضيعوا الفرصة الأولى إلي سمحتلنا الضغط الشعبي على الحكومة؟
علاش نضيعوا الفرصة من إيدينا و الناس الكل كانت تنقد الحكومة و تعبر عن استياءها منها !!
توة كي تعملت حملة و أصبح كل الشعب كلمة واحدة، عاودنا تقسمنا رغم أنّنا نفس الغايات ؟؟؟

أم أنّو فقط عناد ؟ بما أنّو الحملة أطلقها ولاد النهضة ما يلزمش تنضمولها ؟؟

بما أنكم شادين بالسيف في القسمة، فسأتكلّم بضمير "نحن" و الــ "أنتم" و نقلكم :
مطالبكم هي نفسها مطالبنا ..
و أهدافكم هي نفسها أهدافنا ..
تونسكم هي تونسنا ..
نجاح الحكومة أو فشلها يعنيكم و يعنينا ..
كان بالإمكان - و إن كان ماعندكمش ثقة في الحملة في الوقت الحاضر - أنّكم تكونوا العين الحارسة لهذه الحملة حتّى تكتشفوا صدق نوايانا .. و ستثبت لكم الأيّام ذلك ..

مانيش باش نقول يا خيبة المسعى :)
المهم أن تضغطوا على الحكومة تحت أي مسمّى كان :)

و إن شاء الله ربي يوفّقنا لما فيه صلاح هذه البلاد ..




"مساواة تامّة و فعليّة" !!!


موش فاهمة شمعناتها مساواة تامّة و فعليّة أنا !!
يعني المرأة تولّي تخدم المرمّة كيفها كيف الراجل ؟؟ :O (و بالمناسبة تحية تقدير للي يخدموا في رمضان و في مثل هذه الحرارة)..

لا ياخويا أنا ما يساعدنيش، كان إنت تطالب بالمساواة فأنا عاجبتني حقوقي و الحمد لله.. 
ملا حماقة :/ مساواة تامّة و فعلية :/ تي بالله العظيم كان تسألوهم شنوّة ناقصها المرأة و شنية مطالبكم بالضّبط أتوّة يسكتوا، و لا كالعادة باش يحكيو في كل شي و ماتخرجش منهم لا بحق و لا بباطل :/

كيما قال الشيخ وجدي غنيم : "الديك ديك و الفرخة فرخة" :/ لا مساواة و لا هم يحزنون !

وبجاه ربي آش تفهم منّو الطفلة الصغيرة الي هازة شعارات كيما هكا !!
ألا يعتبر هذا متاجرة بالأطفال و بعقولهم، و استغلالهم لأغراض شخصيّة ؟؟ 





تحيّة إكبار لك سيّدتي ..
عيد المرأة هو، و أنتِ كل النّساء .. فلا عيد و لا كلمات كفيلة بأن توفيك حقّك ..




الركوب على عيد المرآة ...


13 أوت 2012 من المفروض أن يكون تاريخ عيد المرأة، لكنّي أراه تاريخا للركوب على "عيدها" :/

استغلال صريح و واضح لقضية المرأة لسد ثغراتهم و خدمة للمصلحة الشخصية ! 

فلا قلوبهم على المرأة و لا على حقوقها، و الدليل واضح أمام كا تلك النسوة اللواتي يعانين الأمرّين في الأرياف و غيرها، المرأة الكادحة التي لا تفقه من عيد المرأة غير تاريخها، و الذي يمر عليهم مرور الكرام كأي تاريخ كان .. فلا يتحدّثون باسمهن و لا يشاركونهن مشاكلهن على أرض الواقع، يكتفون فقط بالتنديد و التشهير و تنزيل صورهن حين تقتضي الحاجة ذلك، كالعادة خدمة لقضية معيّنة من قضاياهم "التخريبية" ..

استغلاليون انتهازيون، شياطين الإنس هم.. 
مستعدون لحرقوالأخضر و اليابس خدمة لمصالحهم، و لكنّي سأسمح لنفسي أن أتحدّث باسم كل النساء اللواتي يتبنين موقفي، نحن لسنا في حاجة لأمثالكم للركوب على ظهورنا و استغلال قضيتنا لأغراض رخيصة دنيئة لا ترقى إلى مكانتنا نحن النساء ..

لن نسمح لأصحاب القلوب المريضة التحدّث بإسمنا و "الدّفاع" الكذّاب عنّا .. لنا من الكفاءات من هم قادرون على تمثيلنا و التحدّث باسمنا و يشرفنا تمثيلهم لنا ..

فيا أيّها المارّون بين الكلمات، احملوا شعاراتكم الكذّابة و انصرفوا ..



أنداء الباطل أحق بالتلبية، أم نداء الحق ؟


قد لا يكون الأمر متأخّرا، و بالإمكان التدارك !

المدعو شكري بلعيد سبق و أن "حرق" قفصة و أحدث فيها بلبلة و هاهو الآن يمر إلى سيدي بوزيد و يشجّع على إضراب عام يوم الثلاثاء 14 أوت..
يشجّع على شلّ ما تبقّى من مؤسّسات عموميّة ناشطة في المنطقة، فلنكن جميعا يد واحدة ضد هذا الإضراب، ولنفشل مخططاتهم التي لا يبغون بها سوى فسادا و تخريبا ..

شكري بلعيد ذلك الحقير الذي طالما نادى بالعنف في جميع بلاتوات التلفزة و في كل حواراته، و آخرها ذلك الإجتماع الذي قام به في ولاية سيدي بوزيد..

بلعيد تلك السوسة التي تنخر عظم السّليم حتّى ترديه مشلولا، يقوم الآن بنخر ما تبقّى من سليمٍ في سيدي بوزيد !!

ندائي إلى أبناء الجهة أن يبطلوا هذا الإضراب إكراما للمنطقة و لمناضليها، فليس لشكري الدجّال و أمثاله سلطة علينا و لا مكان بيننا، هو غير مرحّب به أصلا ..

خاصّة و أنّنا في فترة فتحت فيها أبواب المناظرات العمومية و مناظرة المعلمين و الأساتذة، فكيف لنا أن نشل حركة البلاد في مثل هذه الفترة الحساسة و العديد من المطالب لها آجال معيّنة، و تجاوزها يعني خسارتها !!

إن لم يعتبر كبارنا، و إن كان حس الوطنية قد فــُـــقــِــد للأسف لديهم فعلينا نحن شباب هذه المنطقة حماية ما تبقّى من ولايتنا بعد أن أحرقها اليسار المتمرّد، و النقابيّين الثّورجيّين الذين لا يحمون غير مصالحهم ..

علينا إفشال ذلك الإضراب المقرّر يوم الثلاثاء، لصالح سيدي بوزيد و نكاية في بلعيد و أمثاله، أرجو أن يؤخذ ندائي على محمل الجد، و أن يتم نشره على أوسع نطاق لعلّنا نتفادى هاته الكارثة التي ستحلّ بالمصلحة العامّة إن تم تنفيذ هذا الإضراب ..

ناداهم السبسي بنداء باطل فلبّوا النّداء، فماذا لو نادينا نحن نداااااااااااء الحق ؟؟










samedi 16 juin 2012

زيادات الخدّامة أو تشغيل البطّالة ؟



‎" الحكومة قبلت بتعميم المنحة الخصوصية المقدرة بسبعين دينارا على كافة موظفي الوظيفة العمومية دون استثناء" :/

أكاهاو.. من زيادات نوّاب المجلس التأسيسي إلى زيادات الموظفين العموميّين ماخرجناش !! و البطّال لاخدم !!

توة بالله عليكم، هل نحن في وقت زيادات ؟
كان من المفترض ممارسة سياسة تقشّف على كامل الشّعب بكل فئاته، موش زيادات من هنا و هناك، و كيف واحد من البطالة يتكلّم و يقول نحب نخدم يسكّتوه بدعوى أنّو مافماش برشة أماكن شاغرة في الوظيفة العموميّة  !!

‎" الحكومة قبلت بتعميم المنحة الخصوصية المقدرة بسبعين دينارا على كافة موظفي الوظيفة العمومية دون استثناء" :/

يعني 70 دينار لكل موظف :O
تخيّلوا لو تم ادّخار هذا المبلغ و توزيعه على العائلات المعوزة ؟ فكم من عائلة كان سيغطي عجزها ؟؟
لو تم التبرّع بهذا المبلغ لإحداث مشاريع للشباب الذي يرى نفسه قادرا على إدارة مشاريع و إنجاحها ؟ فكم من مشروع كان ســيــُـــقام و كم من يد عاملة كانت ستــُـــشغّل ؟؟

إلى الاتّحاد العام التونسي للشغل (قاسم ظهر البطّال):
أهذه هي أهداف الثّورة ؟؟ أكانت مطالبنا زيادات إلى موظّفي الدّولة، و البطّال لا خدم ؟؟

إلى الحكومة الموقّرة :
أهذه هي مطالب الثورة ؟؟ زيادات في الشهرية ؟؟ و البطّال لا خدم ؟؟
ألم يكن من الأجدر أن تقفي أمام مثل هذه المطالب "الحمقاء" التي لا يراعي أصحابها إلا مصالحهم الشخصية ضاربين بالمصلحة الجماعية عرض الحائط ؟؟

إلى الموظّف الذي قبل هذه الزيادات :
أليس في عائلتك من يعاني ويلات البطالة ؟
أليس في عائلتك أو محيطك من تجاوز عمره 30 و لا زال يمدّ يديه في خجل لأخذ مصروفه اليومي ؟؟

أرجو مراجعة دليل الثورة التونسيّة جيّدا، حتى تحسنوا اختيار "قرارتكم".. 





lundi 11 juin 2012

إلاّ رسول الله..

إلى كل من يطعن في شباب حركة النهضة و نأكّد على كلمة شباب حركة النهضة: 

أنا و سأتحدّث عن نفسي نهضاوية و لكن انتمائي للحركة لا يساوي شيئا مقارنة بولائي لله و لرسولنا و حبيبنا محمّد رسول الله..

ما صار البارحة لا يجب السكوت عنه بأي حال من الأحوال، يجب معاقبة مرتكبي هذا الجرم الشنيع و الإستهزاء بمقدساتنا تحت راية "الفن"، الذي كانت أهدافه منذ الأزل الإرتقاء بالروح و إيصال رسائل و عبر ..
لم يكن الفن يوما طريقة للهجوم على الديانات أو للمس من المقدّسات، لطالما كانت له رسالة نبيلة و وسيلة للتعبير، كغيرها من الوسائل ..

ما صار البارحة كان من المفترض أن يوحّد شملنا كمسلمين بمختلف انتماءاتنا، أن تنكسر كل الإختلافات لنصرة ديننا، أن تــُـــلغى عبارات "النهضاويين و السلفيين و التحريريين" و تــُــعَــوّضُ بعبارة واحدة : المسلمين ...

لكن ما لاحظته كان غير ذلك تماما :
فبعض "النهضاويين" (و أؤكّد على كلمة بعض) أراهم يشتمون السلفيين الذين هاجموا المعرض !!!
أنا لا أبرّر العنف، فهو غير مقبول، لكنّ ما بدر من السلفيين يمكن أن يصدر عن أي شخص تم استفزازه بتلك الطريقة.. 
إحداث البلبلة و الدخول في دوّامة عنف لا مخرج منها هو هدف تلك النقبة المثقّفة، يحاربوننا بديننا، فتراهم يحاولون بشتّى الطرق استفزازنا تارة بأفلام و أخرى بصور ثم بمعارض .. ثم يدينون العنف تحت غطاء الحريّة..

و من جهة أخرى أرى حملة شنيعة يشنّها بعض "السلفيين" علينا كنهضاويين، و يصفوننا بأبشع الأوصاف و وصلت إلى حد التفوّه بالكلام البذيء (مما يجعلني أشك في صدق نواياهم)، و يصفوننا بالتخاذل و الإنبطاح، لهم الحق في نقدنا لكن دون شتم و سب أعراض..
ما أهين البارحة في ذلك "المعرض" أيضا من مقدّساتنا، فنحن مسلمون و لن نسمح لأحد أن يزايد علينا، و لو رأيتم في الكواليس محاولات شبابنا لردّ الإعتبار و الرد بطريقة راقية لا تصل إلى مستواهم المنحط و حاسمة بلا انبطاح أو غيره، لما تجرّأتم على نعتنا بتلك الأوصاف..

أقولها بكل صراحة، قد تكون حركة النهضة خذلتنا كشباب النهضة، لكنّنا نحن شباب النهضة لن نخذل ديننا و سنندّد كل من موقعه بما حدث تحت مسمّى الحرّية ..

انتخبنا النهضة كي تعبّر عن رأينا نحن كشعب مسلم قلبا و قالبا، و حتّى تكون صوتنا الناطق باسمنا، و كذلك الحكومة التي من واجبها احترامنا كأغلبية مسلمة.. 
كان من الأجدر إصدار بيانات من كل الأحزاب أوّلها النهضة و ثانيها بقية الأحزاب، تندّد و بحدّة ما حدث، بيانات فوريّة و عاجلة دون انتظار..

ثم العيب كل العيب أن يتم تمرير مثل هذه المعارض بعلم من وزير الثقافة الذي منع نانسي عجرم و هيفاء من المشاركة في مهرجان قرطاج باسم "الرقيّ" و "الذّوق الرفيع" ..
أي ذوق هذا الذي تتحدّث عنه أيها الوزير و أنت تسمح لهذه الحثالة باستفزازنا في ديننا "برقعة صحيحة" و بكل ثقة في النّفس، فيخرج علينا الكسكروتاجي الشابي و "السيّد" بشرة بن حميدة و هما يساندان "حرّية التّعبير" !! و يا لها من حريّة ..

لن نرضى بغير عقاب صارم لأصحاب الفن الرّخيص الذين أساؤوا لرسولنا علنا و تحت أنظار الجميع..
إلاّ رسول الله أيّتها الحكومة، إلاّ رسول الله ..



samedi 9 juin 2012

بعد عام و ستة أشهر على الثورة .. فقط في تونس ..





بالله فمة مشكل تمّ طرحه من قبل أحد متابعي صفحة أنا خوانجي، إي نعم أنا خوانجي، ممكن يكون مشكل جانبي، لكن بما أنّي في مرحلة محاولة مقاطعة السياسة (رغم كل الإنتكاسات الي وقعت فيها)، فسأطرح هذا المشكل الجانبي :p


موش باش نذكر الشركة و لا العاملين فيها و لا الشخص الي قلقتّو الحكاية، لكني أسأل النّاس الي تخدم، هل مازال هناك، إلى حد هذه اللحظة، من يضيّق على العاملين و يحاول فرض مظهر معيّن ؟؟ بصورة أوضح هل هناك إلى حد هذا اليوم، أي بعد عام و ستّة أشهر من الثّورة، من يطالب بحلق اللحى ؟؟


يعني إمّا تحلق لحيتك ولا موش لازم تجيني تخدم؟
تحلق لحيتك أو تسمع ما تكره ؟؟
تحلق لحيتك و إلا يتم الجوسسة عليك و على إيمايلاتك و شتمك "في الرايحة و في الجاية" على قول إخوتنا المصريّين ؟؟


إذا إنت يا سيّد تسمح لأصحاب السراول الطايحة و الشعر الطويل و الشعر القصير و الي يعملو الجال و الي عندو بيرسينق و المتبرّجة و و و و و بالحضور، فما ضرّك في أن يطيل أحد لحيته ؟؟ 
يا والله عجب !! ياخي هي لحيتك ولا لحيتو ؟؟ هو قابل بها طويلة و موش مقلقتو، إنت شنية مشكلتك ؟؟ 
زعمة اللحية باش تعيقو عن العمل ؟؟
اللحية باش تحجب الرؤية ؟ و لا باش تمنعو من الكلام و التواصل مع العباد ؟؟


أين هي الحرية ؟؟ نعرف الي حريتك تقف عندما تبدأ حرية غيرك، لكن مانعرش شنية العلاقة بين لحية فلان و حرية علاّن !!؟؟ 


إلى متى هذه المعاملات الحمقاء، و الشروط الغبيّة التي إن دلّت على شيء فهي تدل على أنّ "مخ" الشخص (إذا كان عندو مخ) هي مخاخ فارغة ما فيها شي، رغم كل المراتب العلمية التي يمكن أنو وصللها ذلك الشخص، إلا أنّو يبقى شخص تافه، كل همّه في اللحية و في حلق اللحية.. 


الحرية ليست حكرا على أحد، كل الناس سواسية، موش ناس سنّة و ناس فرض، طالما أنّ حريتي ما فيهاش تعدّي على حرية الآخرين، فليس لأي شخص الحق أن يصادرها تحت أي ظرف من الظروف ..


عنّا مشاكل ما أهم باش نقعدوا نعطيو فيكم في الدّروس حول محور الحرية، الي رسبتو فيه برشة مرات و شي، ماحبيتوش تفهموه..




حمقـــــــى .. :)


















mardi 5 juin 2012

مذكراتي مع الإعلام ..

بكري شوية نتفرج في قناة تونس 7، تحديدا في أخبار 18:30 (موش الثامنة)، المقدم يحكي على موضوع رفض البعض لعقوبة الإعدام، و طلب عدم العمل بها لما فيها من "انتهاك للروح البشرية"..


عاد قام باستدعاء (هاتفيّا) إمام من الأئمة الأفاضل باش يحكي في الموضوع هذا (نسيت اسمو ربّي يبارك في عمرو)..


بدا الشيخ يحكي و استهل كلامه بقيمة الروح البشرية و وجوب المحافظة عليها، أنا قريب نقوم من قدام التلفزة، فللوهلة الأولى يمشي في بال المستمع أنو الشيخ ضد العقوبة لما فيها من تعدّ على الروح البشرية، و المقدّم يهز برأسه مع ابتسامة غبية ههههههه دليل على أنّو موافق كلام الشّيخ..


و فجأة، و بعد تلك المقدّمة الرّآئعة المراوغة، استدرك الشّيخ و قال : لكن هناك بعض الحالات التي تقتضي حتما هذه العقوبة :D


منحكيلكمش على ملامح المقدّم كيفاش ولاّت :D و على الفرحة العارمة التي انتابتني، ولّينا بالبونتوات مع إعلام العار !! 


الحاصيلو مانطولش عليكم، الشيخ ما شاء الله بدا يعطي في الحجج من القرآن و السنّة و يستدلّ بآيات قرآنيّة و المقدّم ساكت مالقا ما يعلّق، و فجأة قطع الحوار على الشّيخ و قالوا بكل وقاحة : لكن يا شيخ ألا ترى أنّو هذه الأحكام فيها مس من حقوق الإنسان ؟
سؤال خطير كعادة تلك الأسئلة الخطيرة.. فكانت إجابة الشّيخ واضحة : لا يمكن أن نخيّر الأحكام الوضعيّة على حساب أحكام المولى عزّ و جلّ و ما جاء في القرآن و السنّة واضح لا لبس فيه، و ماناش باش نعرفو مصلحتنا أكثر من ربّي ..


سكت المقدّم وترك الشّيخ يكمّل كلامه، و ما أعجبني فعلا هو ثبات الشّيخ على كلمته و إصراره على أنّه لا كلام يعلو على كلام المولى عزّ و جلّ، و على سنّة الحبيب المصطفى ..


أعتبره هدف آخر في مرمى الإعلام، و مراوغة جميلة من أحد شيوخنا الكرام..
بما أنّو عيشتي مع الإعلام أصبحت لا تـــُـــطاق فقد اصطنعت لنفسي أجواء منافسة ههههههه حتّى تحلو حياتي مع الإعلام ^^










لن تمرّوا ..


هل يمكن لمن كان بالأمس الصديق الحميم لعدوي اللدود أن يصبح اليوم صديقي ؟؟

سؤال لو طرح خارج إطار السياسة لكانت كل الإجابات حتما بـ "لا"..
لكن ما نراه اليوم شيء يندى له الجبين في كل المجالات، اعذروني عن التعبير و لكني أحس غباء كثيرا وصل بنا إلى حد لا يتصوره عقل، و أكرر اعتذاري عن هذه العبارة التي لا يجوز التعميم بها.. فما أراه اليوم مقزز إلى أبعد الحدود:

كيف لك أيّها المواطن أن تضع يدك بيد من كان بالأمس واضعا يده و ساقه و أنفه في الوحل مع أولئك القذرين، عاشوا في القذارة لسنوات فأصبحت القذارة un système de vie !

غرقوا في الفساد بإرادتهم فشربوا الفساد حتى الثمالة، و ها هم اليوم يودّون لو كان كل الشّعب على خطاهم سائرون و في الفساد يعيشون..
هم أناس ضحكت لهم الدنيا سنوات و لكنها لو دامت، لدامت لغيرهم ممّن سبقهم.

هل يمكن لأصدقاء أعدائنا بالأمس، أن يصيروا اليوم أصدقائنا، أن يخافوا على مصالحنا، أن يتمنّون لنا الخير، أن يساهموا معنا في بناء مجتمع صالح لا فساد يسوده و لا قذارة؟؟

هل يمكن لأصدقاء أعدائنا بالأمس، أن يصادقونا و قد كنّا أعداءهم؟

هل يمكن لأصدقاء أعدائنا بالأمس، من باعوا الوطن مقابل حفنة من المليمات أن يشتروه اليوم بدون مقابل ؟

كيف لك أيّها المواطن أن تثق اليوم بمن غدر بك بالأمس ؟

الإتّحاد العام التونسي للشغل تلك المنظمة التي كانت في يوم ما منظمة عريقة، أصبحت اليوم مطية للركوب على ظهور العملة المساكين و تعطيل مصالح شعب بأكمله، مستغلا عراقته التي أصبحت اليوم ممسحة على أعتاب "مالكيه" .. إي نعم مالكيه، فلم يعد تلك المنظمة التي تنصت للعامل و تنقل شواغله، بل أصبحت "تنظيما" يحاول بكل ما يملك من صلاحيات أن يحافظ على مصالحه مقابل وطن بأكمله..

إعتصامات رغم أنوف العملة و الشعب و الحكومة، تمرّد، تحريض، تخبّط في اللامعروف، عربدة ضوضاء و تشنّج هويّات ..

لكن مهما اعتصمتم و مهما أضربتهم و مهما أوقفتم أشغالا، فللمواطن "الحقّ" وعي نعوّل عليه، و قدرة على التمييز بين من كان يوما صديقا لعدوّي و بين من كان لي صديقا رغم عداوة الجميع له..


dimanche 27 mai 2012

هواية تثبيط العزائم


والله العظيم الواحد ساعات الواحد يقعد حاير في برشة ناس !! تجي تفهمهم تحير !!

كلامي ليس منّا على إخوتنا في فلسطين و لا على "التوانسة" الأحرار ولا شي، لكنه لفت نظر ..

أيام الثورة و إثر بعض أعمال الميليشيا التجمعية التخريبية وحّدنا تصاورنا بعلم تونس ملطخ بالدم، جاو جماعة و قالوا هذا كلام فارغ و يلزم نكونوا أكثر "جدية" !!

مؤخّرا جعنا يوما تضامنا مع أسرانا في فلسطين، طلعتلنا جماعة أخرى و قالوا هذه حركة سخيفة و ماعندها فين توصّل !!

وحّدنا تصاور بروفيلاتنا تضامنا أيضا مع مطالب أسرانا، نفس الجماعة ضحكوا علينا و هبطوا مقالات طويلة عريضة قالك ملا سخافات !! و ما فائدة توحيد الصور، و يلزمنا حاجة نقوموا بيها على أرض الواقع !!

قمنا بالدعاء قالك شعندو يعمل الدعاء ؟؟ الكلو كلام ماعندو ما يفيد !!

سمعوا بلي فمة رجال مشات لسوريا دفاعا عن شرف الأخوات، هاجوا و ماجوا و قالك : هذا إرهاب !! و شنوة يعملو في سوريا و ما يجيش !!

سمعوا بقافلات باش تمشي لفلسطين، قالوا تي أحنا بيدنا جيعانين و تهزوا في القوافل للــ "برّاني" ؟؟

هذا غير العديــــــــــــــــــــــــــــــــد من الأعمال الأخرى "التافهة" !!

مع العلم أنّ كل ما قمنا به من أعمال "تافهة" حسب ما وصفتها تلك الجماعات "المثقّفة" الي فاهمة الحياة أكثر منّا و الي عندها حلول جذرية في خصوص هذه القضايا، كل تلك الحركات الرمزية التي قمنا بها أتت أكلها و كانت نتائجها باهرة !!
بل و كانت نتائج غير منتظرة !!

و ها أنا أراهم اليوم في جميع الصفحات يثبّطون العزائم كالعادة !!

حيث أن خبر انتشر على الفايسبوك مفاده أنّ :
"عشــــــرات الأطفال السويديين يقومون بإسقاط أنفسهم على الأرض فجأة للفت إنتباه الناس إلى أطفال سوريا .."

طبعا هذا الخبر كالعادة تافه عندهم !!
و كل من نشر هذا الخبر أدمين تافه و صفحته تافهة و الي عملوا بارتاج الكلهم تافهين وهوما فقط العباقرة !!
خبر لا يستحق الذكر !! و ملا تبعية و فضائح و العديد من العبارات الأخرى الي من بكري نقرى فيها في الصفحات !

جماعة تهوى و تعشق بل و تحترف بكل إتقان هواية تثبيط العزائم و استنقاص من ذواتنا، تهوى تقزيم الآخر فقط لتضخيم أنفسها ووضعها في موقف "الحكيم" و الي هو في حقيقة الأمر غبي!! تضخيم كذّاب رأس مالهم إبرة صغيرة تفشّهم بيها، فتتّضح الرؤية و يأخذ كل شخص حجمه الحقيقي ..

لو كان جا توحيد صورة لنانسي أو هيفاء إثر سماع خبر وفاتهم راهي الناس الكل وحّدت الصور من غير نقاش !! 
لكن حين يتعلّق الأمر بقضيّة شرف و كرامة يصم الجميع آذانهم و يغمضون أعينهم عنها و تنتطلق حناجرهم بالتنظير و النّباح و الحجج الواهية !!

حقا .. إن لم تستحِ فقل و افعل ما شئت ..


- أدمينة خوانجيّة جدّآآآآآآآآآآ -



jeudi 24 mai 2012

رمضان على الأبواب :)

بدأ العد التنازلي لاستقبال رمضان ..

بدأت تنعشنا رائحة التقوى و الإيمان، صلوات و صيام و دعوات عند سماع الآذان ..هي فرحة تغمرنا بذكر الله و صيام وصلاة تراويح و صلة أرحام ..
هي عبادة نؤدّيها في مأكلنا و مشربنا و صلاتنا و كلامنا و أخلاقنا و كل نفس من أنفاسنا و كل عمل يــُــنجـَــز رغم التّعب بإتقان ..

هما شهران يفصلان عن الثالث ♥ رمضان  ..
فلنبدل ما لنا من جهد دون تقصير أو خذلان ..
في رجب فلنستعدّ، يليه انطلاق في شعبان، و لنكمل ثورتنا الأروع من بين الثروات، ثورة التسعين يوما إلى آخر شهر رمضان ..
هي ثورتنا على النفس و الشهوات و المعاصي ..

هو شهر ليس ككل الأشهر، هو شهر التّقوى و العبادة و كرم من العزيز المنّان ..
حيث يــُــصفّد الشّيطان و من كلّ ضلال يتحرّر الإنسان ..
شهر العبادة و الإيمان، شهر تلاوة القرآن و الختمات المتتالية و توبة نصوح مقبولة (بإذن الله) من الكريم الرّحمان..

هو شهر ليس ككلّ الأشهر، هو شهر رمضان..
حيث العشر الأواخر و ليلة القدر و دعوات مستجابة (بإذن الله) و أبواب رحمة مفتوحة لكل مذنب عاص ..

هو شهر رمضان..

اللهم بلّغنا رمضان :)))





vendredi 27 avril 2012

العــِـلـْـمُ للجميع

موضوع كنت أتحاشى التطرق إليه، لسبب بسيط و هو الأمل في النظر إليه نظرة جدية و التفكير فيه عمليا و في أقرب الآجال، إلا أنّني ألاحظ إهمالا كليّا له و كأنّه لا يعنيهم ..

فما تعيشه بلادنا من تظاهرات و زيارات لشيوخ و علماء و فنانين ملتزمين و ضيوف كرام، يزيد حتما في شعبيّتها خاصة و أنّنا قد قمنا بثورة يشهد لها الجميع بنجاحها رغم كل المشاكل التي نعيشها، فحينما نرى ما يحدث ببلدان أخرى علينا وجوبا أن نحمد الله على نعمة قد أنعم بها علينا دون شكر منا ..

كما ذكرت سابقا، نــُـــسعد كثيرا بمثل تلك الزيارات أو حتى بالتظاهرات أو الإجتماعات التي تتمّ. لكن ما لاحظته و ما حزّ في نفسي أن هؤلاء الضيوف كانوا و لازالوا حكرا على أماكن معيّنة في الجمهورية التونسيّة !! نفس الأماكن يزورها الضيوف و تظل بقيّة المناطق تراقب التظاهرات من بعيد !!
نكتفي فقط بنقاط نقرأها حول تلك الزيارة على صفحات الفايسبوك، أو ربّما فيديو ملخّص أو مسجّل، و في أفضل الأحوال نتابعها مباشرة من إحدى القنوات على الأنترنات streaming !!
بسرعة تدفّق تصيبنا بالغثيان ..

لا أريد لأصحاب القلوب المريضة التعليق على كلامي بقول : كفاك إشعالا للنعرات الجهوية، أو كل المناطق سواسية و لا أساس لكلامك من الصحّة، أو مثل هذه العبارات التي حتما لا أقصدها..

ألا يحق للمناطق الداخلية أيضا المشاركة في تلك التظاهرات ؟
أيجب على سكّان المناطق الداخلية فقط التنقّل إلى العاصمة أو إلى بعض المدن الأخرى، لمشاهدة محاضرة لاسماعيل هنية أو وجدي غنيم أو محاضرة للشّيخ راشد الغنوشي ؟؟ ألا يمكن أن يكون التنقل في الإتّجاه المعاكس ؟
المطلب ليس تشغيلا أو عدالة اجتماعية (على الأقل في هذه الفترة)، لكنه مطلب ثقافي بالأساس، نريد ثقافة للمناطق الداخلية و تحريكا لما ركد لسنوات.. نريد نظرة جدية في التعامل، فالثقافة ليست حكرا على ولايات معيّنة.. ليس في مقدور الجميع التنقل من الجنوب إلى الشمال للمشاركة في محاضرات شيوخنا..
علينا إلغاء هذه المركزية التي ترسّخت منذ القدم، و اقتصار بعض الولايات على بعض النشاطات التي أصبحت حكرا عليهم ..

أجّلت الحديث في هذا الموضوع كثيرا أملا في أن يتم تفاديه لكني أراه يترسّخ، فالزيارات تتوالى يوما بعد يوما، و ما من ملاحظ لهذه الظاهرة..
أفضل ما في الثورة أنها وحدت الجميع في 24 ساعة فأصبح ما من فرق بينهم، هي فقط اختلافات وهمية رسّخها العهد البائد، لكنّها تلاشت حالما تلاشى ذلك العهد و مر..

أرجو أن يتم النظر إلى هذا الموضوع بصفة جدية ..

تحيّاتي ..
 
 

dimanche 22 avril 2012

من الآخر ؟ يلزمنا قناة تحكي باسمنا ..

السلام عليكم يا جماعة..

قصّتي مع القنوات التونسيّة، قصّة حقد لن تنتهي :/
تأبى إلاّ أن تعكّر مزاجي ع الصّباح ..

اليوم صباحا و أنا أتنقّل بين القنوات علّني أجد بعض البرامج التي تعجبني، و إذ بي أمرّ عن طريق الخطأ بقناة المستقلّة !! قناة العريضة :/
فلمحت مداولات المجلس التأسيسي و قد كتب عليه عبارة "مباشر"، من الأوّل مررت لكنّي فيسع ما رجعت حتى أكتشف ماهذا الذي تمرّره هذه القناة !!

و قد فاجأني ما رأيته، مداولات المجلس التأسيسي كانت قديمة أوّل حاجة و ليست مباشرة، و ثانيا اكتشفت أنو المداولات التي يتم تمريرها كانت تلك المهزلة التي صارت و التي طرد فيها نائبان من العريضة..

ما نعرش قداش من مرّة تمّ تمريرها، و ما نعرش شنية الأوقات التي تمّ فيها تمرير هذا الجزء من المداولات، لكن ما أستطيع قوله أنّ الغاية من هذه الإعادة واضحة و جليّة..
للعريضة قناة (صحّة ليها) و تأثير في فئة من الشّعب، علينا وجوبا احترامهم، لأنّ ما تبثّه القنوات من سموم، قادر على اللعب بمشاعر الزوّالي و كسبه في صفّهم..
هذا ما تفعله القنوات، و العريضة استعملت و بــ "ذكاء" قناتها فكانت هي القوّة الثالثة على السّاحة السّياسيّة، شئنا أم أبينا..

أخطأ نوّاب النهضة في قطع الكلمة على نوّاب العريضة، لكن خطأ نوّاب العريضة أفدح و أفظع، و ما صدر من كلام جارح من هؤلاء النوّاب مسّ رئاسة المجلس و نوّاب النّهضة و فئة كبيرة من الشّعب التي انتخبت النهضة و المؤتمر و التكتّل..
أخطأ الطّرفان : نوّاب النّهضة و نوّاب العريضة، و لكنّ تمّ تهويل الخطأ الصّغير و تصغير الخطأ الفادح، و أصبح نوّاب العريضة في حالة دفاع عن النّفس ..
للأسف هذا هو دور الإعلام المسيّس و الإعلام غير المحايد الذي يخدم أغراض دنيئة لا علاقة لها بها بمصلحة تونس..

حزّ في نفسي ما رأيته، حقيقة، تجاوزت مرحلة الغش و العصب و غيرها من المشاعر التي تنتابني كلّما "تعثّرت" بأحد هذه القنوات، لتصبح خوفا من مستقبل في ظل هذه القنوات..

عنّا مثل تونسي أعتقد أنّو يلخّص كل الكلام، يقول : الدّوام ينقب الرّخام..

و مختصر الكلام : لابدّ من إعلام يحكي باسم الشّعب..
كفانا مغالطات و اسم الشّعب الذي أصبح يرتبط بمن هبّ و دبّ..
 
 
 

jeudi 19 avril 2012

إعلام بودورو

تفرّجت منذ قليل في القناة تونس 7، أخبار الثامنة تحديدا، الي في العادة تحكي على أخبار الموزمبيق، لكن اليوم لفت سمعي و بصري و كل حواسّي خبر حول الحكومة !! إي نعم الحكومة !!
قناة تونس 7 تحكي على نسبة النمو !!
تشوكيت و قعدت نسمع :
نسبة النمو بلغت 2 و لكن ... ارتفاع نسبة النمو و لكن ... تحسن مستوى و لكن ... تحسن ملحوظ و لكن ...

... الحق متاع ربّي قعدت حايرة كيفاش تونس 7 تحكي على إنجازات الحكومة، و لكن ما عجبنيش الإستدراك متاعها، حسّيت إلي ورا كلمة "ولكن" غاية ما..
قعدت نتبّع بانتباه و هوما بعد كل جملة يقولوها فيها كلمة تحسّن يزيدوها كلمة "و لكن"..

إلى أن جاءت اللّحظة الحاسمة و قال "شبه الإعلامي" :
و نستضيف في الأستوديو محلّل اقتصادي (حسب ما نتفكر) لمناقشة هذه الأرقام.
و كان أوّل سؤال سأله مقدّم الإخبار : ما مدى صحّة هذه الأرقام ..
و قعد يعاود في نفس السّؤل : ما مدى صحّة هذه الأرقام..

حتّى كيف حاول المحلّل أن يفسّر الموضوع و مبعد يجاوبو، قاطعو المقدّم بإعادة السّؤال : هل هذه الأرقام معقولة ؟؟
طبعا أنا لست محلّلة اقتصاديّة و موش باش ندخل في التّفاصيل، لكن موقف شدّني ما نجّمتش ما نحكيش عليه، خاصّة و أنّ المنشّط ألحّ إصرارا على إعادة السّؤال أكثر من مرّة..
و ختمها بتهكّم على التصريحات قائلا :
هوما قالوا في المجلس التأسيسي النسبة تبلغ 2 ماقالش تقريبا !! بنبرة المتهكّم ..

قد يكون كلامي مبالغا فيه، و قد أكون مخطئة، لكن هذا ما وصلني من خلال ما رأيته و ما سمعته و ما صدر عن المقدّم التي كانت نيّته واضحة في التّشكيك في مصداقية الحكومة و تكذيب كل ما يمكن أن يكون في صالحها، و ما قد يعزّز ثقة التونسيّ بها ..

هو أكّد قائلا : أنا لا أريد التّشكيك، فقط نريد توضيحا ..
و أنا أقول له : أنت لا تريد توضيحا إنّما تريد تشكيكا بشتّى الطّرق ..
تريد معلومات تضع الحكومة في محل الإتّهام و تزوير الحقائق، حكومة فاشلة تعتمد الكذب لتلميع صورتها ..

فعلا هي أساليب رخيصة برخص مستواكم يا إعلام العار..
مستويات منحطّة لا نستغرب مأتاها، فالشيء من مأتاه لا يـــُــــستغرب ..

شكرا إعلامنا على تمريرك لــ "تقرير" حول زيارة وزير خارجيّتنا إلى الصّين بعد 3 أيّام من الزّيارة..
شكرا لتواضعك ..


mercredi 18 avril 2012

سموم الإعلام


تجربة :
تعمّدت الفترة الأخيرة أنّي نبتعد على السّياسة و حتى نشاطي على الفايسبوك ابتعدت به كل البعد عن السّياسة، و قلت خليني نتبّع التّلفزة كيما يتبّعوا النّاس الكل.
برامج تلفزية و منابر حوار و منشّطين و قنوات "تونسيّة" بكل اتّجاهاتها..

و يا ريتني ما عملت هذه التجربة، لكن الحمد لله أنقذت نفسي في آخر اللحظات..

الجميع يعلم أنّ الفايسبوك هو حكر على فئة معيّنة، شئنا أم أبينا، فأغلب التوانسة، مصادرها الأساسيّة في استسقاء المعلومة هي التلفزة و الصحف المكتوبة (هذه يلزمها تجربة وحّدها)..

و كانت النتيجة أني شويّة لا صدّقتهم و كرهت كل ماهو سياسة و أصبحت أنظر إلى الحكومة بعين الإستغراب، مع العلم أنّي حاطّة في مخّي الي أنا ما يلزمنيش نصدّقهم، و لكن مع ذلك كانت كل برامجهم توهم المتلقّي بصدقهم و ذلك بأساليب للأسف يمكن أن تكون مقنعة للتونسي البسيط..
موش الشعب بكلّو متابع للشأن السياسي عن كثب، و موش الشعب بكلّو يعرف الي فمة صراعات قد يكون مآلها إلى ما لا يــُــحمد عـــُقباه للأسف..

و المشكل أنو الحكومة (عن قصد أو عن غير قصد) غير واعية بهذه المشكلة الكبيرة، ساعات نحس إلي هي متساهلة في حكاية الإعلام إلى أبعد الحدود، و كأن الإعلام لا يعني شيئا، أو أنّو ما عندو حتّى فايدة على السّاحة السياسيّة !!
في حين أنّو خلال هذه التجربة القصيرة (و الحمد لله) لاحظت أن الإعلام اللاوطني له تأثير كبير على مشاعر التونسي: كي تجي تمسّو في البطالة أو تجيبلو نائب من المجلس التأسيسي يحكي على البطالة و جرحى الثورة و الحقيقة أن كل كلامه سموم يبثّها في هذه القنوات، ما ينجمش التونسي يقول لا هذا قاعد يكذب !!
خاطر ما يعرش الحقائق، هو فقط يقيّم النائبين بما يراه في التلفزة و الي هي طبعا قاعدة تلمّع في صورهم تلميعا غير طبيعي بالمرّة !!

لن أطيل..
مختصر القول : يجب أخذ موقف حازم من هذه القنوات و عدم الإستهانة بدورها الرّيادي في تنويم التونسي تنويما مغناطيسيّا متقنا..
كل القنوات تشن حملة شعواء على الحكومة (مانيش باش نحكي على الهجوم الي عاملينو على النهضة)، وجب التصدي لها بصفة جدية..

حتّى أنّ الكلمة المشهورة التي أصبح يتداولها التونسي : ياخي القنوات الكل غالطة و تكذب و الحكومة هي الصحيحة ؟؟

لا يجب الإستهانة بدور الإعلام، فهو يعلم جيّدا دوره في قلب الموازين، لذلك نرى استماتة ما بعدها استماتة في تزييف الحقائق و الامتناع عن بث كل ما يمكن أن يعيد للحكومة هيبتها في أعين منتخبيها..


غلاء المعيشة و ارتفاع الأسعار

نعملوا إضراب جوع شعب كامل باش تتهنّاو ؟
نقطعو الماكلة و الناس الكل تعمل ريجيم باش ترضاو علينا ؟؟
نعتصموا شعب كامل أمام الخضّارة و في الأسواق باش تتواضعو و ترحمونا ؟؟

يا تاجر و يا خضّار و يا جزّار ياخي إنت تونسي ؟
أطرح السؤال بطريقة أخرى : ياخي واعي إلي أحنا توانسة ؟؟

بالله فين ماشين بغلاء الأسعار ؟
راهو جيب التونسي تهرّا و تنقب و ماعادش منجّم يكمّل !!
كيلو بطاطا : 1600
كيلو فلفل : 3000
كيلو طماطم : 2000
و غيرهم كثير !!

يا تاجر ارحموا من في الأرض يرحمكم من في السماء !
فترة كان من المفروض أنّها تكون فنرة تعاون و نهوض بالبلاد من جميع الأطراف ! أصبحت فترة استغلال، و كل واحد يلوّج لأخذ نصيبه من كعكة البلاد.. الكعكة التي أسالت لعاب الجميع و أصبح كل فرد (إلا من رحم ربّي) يبحث عمّا فيه مصلحته ضاربا مصلحة أخيه التونسي عرض الحائط..

أغلب السياسيّين راكبين على الثورة بجميع أهدافها : جرحى الثورة، البطالة، التنمية و ذلك لخدمة مصالحها السياسيّة على حساب أمن البلاد، تكمّل حتّى إنت يا تاجر تاخذ المشعل من هؤلاء الخونة حتى تكمل مشوار الخيانة و الفساد الأخلاقي الذي لا نهاية له ؟؟
حتى إنت يا تاجر يا تونسي أصبحت تتاجر بغذاء الزوّالي ؟؟
أسعار نااااااااااااااااااااااار، و التونسي بين المطرقة و السندان، لا ينجّم يقاطع الماكلة و لا ينجّم يشري ؟؟

على كل التونسيين الوقوف جنبا إلى جنب أمام هذه الظاهرة التي قسمت ظهر التونسي.. ظاهرة غلاء المعيشة التي أصبحت شغله الشاغل الزوّالي : اليوم شنوّة باش نطيّب ؟ و شنو باش نشري، كيما يمشي للسوق كيما يروّح ..
ألم يحن الوقت باش حتّى الزوّالي يخدّم مخّو ؟ إي نعم يخدّم مخّو و يوقف هؤلاء الطفيليات على العيش على حساب عرق الآخرين.. بات من واجبنا التصدّي لهذه الظّاهرة و الامتناع وجوبا عن شراء المواد الغذائيّة من أصحاب القلوب المريضة التي تتعمّد الترفيع في الأسعار، يجب مقاطعتهم مقاطعة كاملة و من قبل الجميع (و إن كان والدك هو البائع)..
أثبتت سياسة المقاطعة نفعها عديد المرّات، خاصّة عندما يتّحد الجميع في تطبيقه كقرار شعبوي.
فلا صوت يعلو على صوت الشعوب ..

قد يكون كلامي موجّه إلى الشعب خاطر نعرف الي الشعب هو الوحيد الي باش يفهم كلامي، لن أوجّه كلامي إلى مراقبي الأسعار التي أصبحت مهمّتهم شدّان البيريوات و القعدة و التونسي إن شاء الله يتفلق، مراقبي الأسعار الي غلّبوا عليّا و أصبحوا (حسب رأيي) من المساهمين الأوائل في ارتفاع الأسعار و ذلك لتقصير واضح في مهامّهم، و بالتالي مشاركين من الدرجة الثانية في خيانة الأمانة و خيبة أمل الزّواولة..
نفس الشيء بالنسبة للحكومة التي لم تبدي موقفا حازما في هذا الشأن و تركت التونسي يتخبّط بين موطن شغل غير موجود و ارتفاع في الأسعار ..

أرجو من الجميع تحمّل هذه المسؤوليّة ابتداء من المستهلك الذي يجب أن يقاطع الخونة، مرورا بالبائع (ارحموا من في الأرض يرحمكم من في السماء)..

الوطن مسؤوليّة الجميع، ليس فقط مسؤولية الحكومات ..


mardi 10 avril 2012

إن لم تستح، فزايد على المناضلين ..

تفرّجت بكري شويّة في فيديو مخزيييييييييييييي، إي نعم مخزي بأتمّ معنى الكلمة :/
فيديو لمرأة تدّعي الثّقافة و تتبجّح بقدرتها على السّفر و على العيش خارجا و على الاستثمار خارجا لكنّها تريد العيش في تونس..

صحّة ليها ..

يا للّة مرحبا بيك في "بلدك التّاني" تونس (بحكم أنّو بلدك الأوّل هو فرنسا)، مرحبا بيك في تونس و مرحبا باستثماراتك (رغم تحفّظي عليها اعتمادا على كلامك)..
مرحبا بيك في تونسنا الكل (موش تونسك وحدك) شريطة أن تحترمنا و تحترم كل تونسي، البلاد موش على حسابك باش تجي تعيث فيها فسادا و تمشي، البلاد موش ملكك باش تقمع فئة على حساب خدمتك (الي حسب ما فهمت فيها بيع الخمر)..

النّاس الي تتّهموا فيهم أنّهم كانوا في الخارج في وقت إلي التوانسة كانوا ياكلوا في الضّرب في تونس نقلّك يا للّة إلّي هوما الي كان منفي، و إلّي طالب اللجوء السياسي، و الّي كان ممنوع من دخول تونس، و لكن أغلبهم كانوا في تونس في غياهب السجون وقت الي إنت شايخة بفلوسك في فرنسا !!

إنت كل همّك أنّك "تصب الشّراب" (و سامحوني في الكلمة) لتوريست، كل مصلحتك منصبّة في كون الخمر لا ينقطع في تونس !! و تقلك التونسي حنين على خوه التّونسي ؟؟
إسكار المجتمع و إغراقه في الفساد هي حنّية ؟؟
تمييعه و تحييده عن الطريق المستقيم هي حنّية ؟؟

و الأغرب أنّو كل واحد ما يلقى ما يقول و يحب يبرّر قذارة عمله يقلّك : مالا علاش عملنا ثورة ؟؟ راهي حرّية !!!
حرّية ؟؟؟
الثّورة تعملت على الشراب ؟؟
الثّورة تعملت باش إنت و أمثالك من الرّاكبين يتبجّحوا بكل حقارة و دناءة و يقلّك : مالا علاش عملــ"نا" ثورة ؟؟ شكون "ــنا" ؟؟ إنت سيادتك إلي عملت الثّورة ؟؟
ماو كنت في فرنسا ؟ و قادرة على السّفر ؟ و قادرة على إحداث المشاريع غاديكا ؟ و موش عاجبتك العيشة في تونس ؟؟ و خايفة قطاع السياحة يتضرب و ماعاش تنجّم تبيع الشّراب متاعك ؟؟

يا للّة تنجّم ترجع من حيث أتيت و خلّينا لاهين في من لا قدرة له على الحصول على لقمة العيش !! خلينا نعانيو في أيتام فرنسا و بورقيبة و المخلوع، ماناش ناقصين ناس تجي تبهبر علينا من برّة و تحكي باسم الشّعب !! ما انحبوش كلمة الشعب ترتبط بأسماء و بأفكار و بمواقف مخزية تعمل العار مثلكم إنتوما !!
خلي الشعب يتكلّم على روحو من خلال نوّابه الذي انتخبهم !!

الجميل أنّو لا يوجد و لا نائب واحد قادر على تمثيل الشعب بأكمله، كل نائب و له مسانديه و كل فئة من الشعب لها ممثّلها !
فليعطي الشّعب الثّقة في نوّابه و ليكن النّواب على قدر هذه المسؤوليّة الي حمّلتهالهم فئة معيّنة من الشّعب !!

كفاكم ركوبا على ظهورنا راكم قسمتو ظهورنا :/
كفاكم ركوبا على القضايا راكم ميّعتو القضيّة و كرّهتونا فيكم !!
و الي يحب يحكي على الثّورة من أي طرف من الشّعب يعرف روحو شيحكي و شيقول، وإلي موش عاجبو و قادر على العيش البرّة يتفضّل المطار واسع و عريض و ما كثّر ربّي كان الطيّارات.

برشة ناس باش تقلّي تونس للجميع و باش تولّي تتّهم فيّا إلي أنا نقصي فئة من الشّعب نقلّهم :

إي نعم نقصي !!
إلّي موش عاجبتو تونس و نهار الكل و هو يتبجح بقدراته المادّية (ربّي يزيدهم) يتفضّل يخرج و يخلّي أهل الدّار لاهين بدارهم ماحاجتناش بناس تجي من برّة تنظّر علينا و كي تعرفها كلات بعضها تعاود تهرب !
إلي يدّعي الحنّية يتفضّل يمشي للجنوب و يساعد النّاس الفقيرة موش يحكي و بكل وقاحة إلي هو قادر و لاباس بيه !
إلي عندو الفلوس يتفضّل يعاون جرحى الثّورة يربح فيهم أجر !!
موش تجي تنظّر و تزايد على نضال المناضلين و تصف أسيادها كونهم عبّاو أجيابهم بالفلوس !!

أما زايد فلّي ما يحشمش..
زايد إلي فاهم الحرّية بالغالط ننصحو يمشي يعمل إعادة تأهيل في البلاد الديمقراطيّة، لو كانت جات البلدان الي تسكنوا فيها ديمقراطية قولا و فعلا راكم ما هربتوش منها..

كفاكم مزايدات على المناضلين الحقيقيين (موش الي كانوا مناضلين و مبعد ولاّ حثالة المجتمع) ..
كي تعملوا ربع الي عملوه وقتها أهبطوا أحكيو في الشارع و أعملو فيديوات على رواحكم ..

فعلا إن لم تستح فقل و افعل ما شئت، و صوّر فيديو و زايد فيه على المناضلين ..