ها نندبهم ها

السّلام عليكم.

"ها نندبهم ها" على رأي رئيسنا المفدّى .. عبارات استعملها سابقا و ها أنا أستعملها اليوم :(

يا سيدي البارح الدنيا قامت و لم تقعد، علاه ؟ خاطر المترشحين لمناظرة الحرس الوطني اجتازوا اختبار، و الي هو عبارة عن QCM، إلى حد الآن شيء عادي .. باش تقولولي فين المشكل ؟ نقلكم إلي المشكل أنو في الإختبار فيه شوية أسئلة دينية -_-
إي نعم الدنيا قامت على شوية أسئلة دينية في الإختبار :(

60 سؤال كاملين، عينيهم عمات على الأسئلة الإقتصادية و الرياضية و الفنية و أسئلة التاريخ و الجغرافيا ! أنوفهم المزكومة ماتحسست كان من الأسئلة الدينية !

أيا سيدي قلنا برة ميسالش، خاصة و أنّو الوزارة (وزارة الداخلية العريقة) أصدرت بيان قالت إلي "الفضل بين المضمون العام للإختبار يــُـــعتبر قراءة خاطئة) و ما فماش علاه التأويلات هذه الكل !

حقيقة أعجبني رد وزارة الداخلية و قلت الحمد لله بيان كالسيف يخرس أصحاب القلوب المريضة و إلي عندهم حساسية من كل حاجة اسمها دين ..

لكن يا فرحة ما تمت :'(

للات الكل، وزارة الداخلية حرقها الحليب على الجماعة الي خايفين يرعشوا من كلمة "الدين" و ماحملتش فيهم :'( (قلبها الصغير لا يحتمل مسيكنة)، هاوكا رضّاتهم اليوم (كيما رضّاتنا أحنا البارح) و فتحت تحقيق في "الحادثة" و الأمرّ من كل هذا أنها قررت إعادة الإختبار مجدّدا :/

وينها قبيلة قريش ؟ خلي تجي هي تعدّي الإختبار و نتفاداو المشكل من لغاليغو !

و إنتوما صرفتو صرفتو، هاتولنا أتوة نحضرولكم أحنا اختبار في قلّة التربية و قلّة الحياء، شوية أسئلة على ملكة جمال الكيان الصهيوني، على شوية جرائم اغتصاب، على شوية جمعيات (مانحبش ندنّس بروفيلي بذكر أساميهم) على FREE ... SAMI، مع أسئلة على الأبراج و حظّك اليوم، و هكّاكا ترضى علينا النخبة المستثقفة متاعنا ..

و سمعني أحلى سلام على أحلى أيادي مرتعشة في تاريخ البشرية .. :)

جاري الفرز ..

بعضهم يتمنّى فشل الثورة التونسيّة (ملهمة الثورات العربية) ، فتراهم يثبّطون العزائم مقلّلين من قيمتها كثورة حرّرت بعض البلدان العربية (و مازالت تحرّر) من رموز الفساد و من حكم ديكتاتوريّيها و ظلاّمها الأشدّاء ..

حرّرت الشعوب من شبح الحاكم الجاثم على صدورها و الكاتم لصوت الحق، المانع للتّعبير ..

حرّرت مظلوميها، و فضحت ممارسات كانت بالأمس "مستورة" تحت غطاء "الحاكم العادل" ..

كنّا نرى المظلوم يــُــقتّـــل و يــُــحرم من أبسط حقوقه كمواطن، له في هذا البلد حق و عليه واجب تجاهه ..

رأينا بعضا ممّن كانوا يدافعون على حقوق المظلومين، أصحاب مبادئ و قيم يعانون الويلات  لدفاعهم فقط عن المظلوم ..

هكذا كانت بــُـــلداننا قبل ثوراتنا، فقد كان الشعب مغيّبا تماما عما يدور في دواليب السياسة، تراه مقسّما إلى ثلاث: 

1) جزء مظلوم، أصحاب مبادئ، لا يرضون إعلاء غير كلمة الحق، عانوا الويلات .. كانوا بنظرنا أبطالا ..

2) جزء مساند لنظام ديكتاتوري، مستعد لدفع الغالي و الرخيص دفاعا عنه (و بالتالي دفاعا عن نفسه) ..

3) الأغلبية الصامتة إمّا لعجزها عن مجابهة نظام ظالم، أو لجهل منها و عدم اهتمام و الإكتفاء فقط بالــ "حياة" ..

هكذا كانت شعوبنا ..

و اليوم بعد قيام الثورات و صحوة شعوبها من سبات ديكتاتوري، ترى من يشكّك فيها و في عفويتها فيربطها بــ "مؤامرات"، و يحيك قصصا خيالية تبرز مدى تأثره بأفلام الأكشن، حتى تكاد تصدّقها لترابط أحداثها الوهمية ..

لا ألوم المشكّكين في ثوراتنا لأمر بسيط جدّا .. لتأكدي (من خلال كل ما يجري) أنّها فضحت حقيقتهم و ممارساتهم .. 

لتأكدي من أن كل تلك "المبادئ" التي تظاهروا بالتمسك بها لم تكن يوما مبادئ لقضايا إنسانية (كما أوهمونا)، بل كانت لأغراض في نفس يعقوب ..

ليس تحاملا، ولكن ما نراه اليوم من "لامسؤولية" و "لاوعي" و "ردّات فعل" و "تصاريح" ممّن كانوا يدّعون النّضال في زمن الجمر، يؤكّد مااستنتجته ..

يتمنّى أولئك لو ظلّوا مناضلين في زمن الجــَـــوْرِ، حتّى لا نرى منهم غير نضالاتهم (ولا عالم بالنفوس غير المولى عز و جلّ) ..

أسقطت ثوراتنا الأقنعة عن الكثير، فأصبحوا يمشون مكشوفي السرائر، مفضوحي الأفكار !

نزعة الشر و ميلهم للعنف و الإقصاء واضحة جلية من خلال أفعالهم و أقوالهم !

تندهش لـ "مناذل" سابق ينادي بالعنف أو يمارسه (لفظيا و معنويا) !

سحلوا نضالاتهم على قارعة الإنتهازية و الوصولية بكل وحشية، فآذوا الشعب (بانصدامه فيهم) قبل أذيّة أنفسهم (بتشويه سنوات نضالهم) ..

أتفهّم تشويهكم لثوراتنا :)

فقد سقطت ورقة التوت، و فضحتكم .. و جاري الفرز بين المناضل الحق و "المناذل" مع سبق الإصرار و الترصد ..

استيقظ الشعب من سباته و لله الحمد و المنّة، و لم يــعـُـد مغيّبا كما السابق، و صار له من الوعي ما يفرّق به بين الغثّ و السمين ..

ثوراتنا ثرواتنا و لن نفرّط فيها، يكفي أنها وضعت أعداء الوطن تحت المجهر فصرنا نراهم بوضوح، و من الحقيقة ما صدم ..

لن تتحقق أهداف ثوراتنا في عامين ولا في ثلاث، فــتــَركة عقود من الفساد لن يتم إصلاحها في فترة وجيزة، لكن تحديدنا للأعداء خطوة أساسية في بناء مجتمع صالح همّه الوحيد الإرتقاء بالوطن بصدق ..

شكّكوا في ثوراتنا كما شئتم، فعلى قدر تشكيككم بها يكون يقيننا بــ "نذالاتكم" .. :)

#لن_نصالح

المنصف العجيمي، كمال لطيّف، كمال مرجان، برهان بسيّس، سليم شيبوب و القائمة تطول، الأسماء هذي الكل و غيرها من الأسماء الي ما نستحضرهاش حاليا، الكلها وجوه ظهرت و طلعت على قنوات تلفزية و إذاعات! في حين أنّو مكانها الطبيعي هو السّجون !

الكلها حكات و برّأت ذممها و قالت : أنا لست منخرطة في "منظومة فساد" !
الكلها "اعترفت" أنو شاركت سابقا لكن مشاركات "خفيفة" !
الكلها اعترفت أنو ربّما قد أخطأت !!
و الأخطر من هذا الكل أنّها اعتذرت ! إي نعم اعتذرت و كلّها أمل أنّو الشّعب باش يسامحها و يقبل اعتذارها !

شخصيّات لها من القدرة و البلاغة و الفصاحة (بحكم الخبرة) على الإقناع و كسب تعاطف المتفرّج، الكثير ! الشيء الذي يجعل الشّخص البسيط، إلي ما عندو كان التلفزة و الإذاعة يستقي منها الأخبار، لوهلة يصدّق ما يــُـــقال !

إعلام العار و العار أبسط صفة انجموا ننسبوها إلى هذا الإعلام طلع أخطر بكثيــــــــــــــــــــــــــر ممّا نظن !!
هذا الإعلام يعتمد طريقة خبيثة في التعامل مع الشخصيات التي كان لها يد في النظام السابق، بحيث يحاول تنظيفها و تلميعها و إخراجها بصورة المخطئ الذي يعتذر و يطلب الصّفح من الشعب !! و كل هذا يسري فينا مفعوله كما يسري ذلك السمّ في أبداننا، أما سم بطيئ المفعول، ما يعطيش نتيجة في وقتها و إنّما بعد مدّة !

لذلك وقت إلي بدات ظاهرة "تبييض الماضي" كانت ردّات فعلنا عنيفة في البداية ثمّ بدات تفتر شيئا فشيئا :

المرة الأولى كنت تتصدم و تستنكر و تصرخ
المرة الثانية تستنكر و تصرخ
المرة الثالثة تستنكر
ثم بعد ذلك تندهش 
المرة الي بعدها تقاطع البرنامج أو القناة 
المرة اللي بعدها تحبّ تتفرّج من باب الفضول حتى تكتشف شنوة في الحوار 
و في المرحلة الأخيرة، تصبح الشخصية الفاسدة التابعة لأزلام النظام البائد مصدر للتنبير فقط !! 

الإعلام هذا استغل عاطفة الشعب و تعطّشه إلى معرفة التفاصيل الي صارت أيّام الثورة ! 
شئنا أم أبينا حقيقة ما صار تلك الايام لا يملكها إلا أمثال شيبوب و غيره ! لذلك تلقى الشعب الكل يستنّى في الحوارات من هذا النوع لا لشيء، إلا باش يلقاشي معلومة مفيدة أو حكاية يرويها "البطل" في خصوص ما حدث تلك الايّام !!!

ما يصير اليوم على بلاتوات القناوات و البرامج الحوارية المباشرة هو مصيبة كبيرة و جريمة خطيرة تــُـــرتــَــكب في حقنا نحن كشعب تونسي قام بثورة ! 
سياسة "تعويد" المتفرّج على هذه الوجوه حتّى تصبح شيئا عاديا في أذهاننا !!

ما صار الليلة و مازال باش يصير، هو محاولة لقتل آخر عرق حي في ثورتنا، التي كانت في يوم ما ثورة مــُـــباركة ..


#لن_نصالح

اسمع يلّي ما سمعتش ..

اسمع يلّي ما سمعتش : تسجيل صوتي - للسيّد حمادي الجبالي و للباجي قايد السبسي - مسرّب !!
فيديو اجتاح الفايسبوك في أقل من ساعة، الناس الكل حكات عليه و فرّغت طاقاتها السلبية و الإيجابية، إلي بدى يدافع و إلي يهاجم و إلي يسب و إلي يمجّد و و و !!

الحاصيلو ضجّة كبيرة، صحيح في البداية عندها أسبابها لكن بمرور الوقت و بهدوء الأعصاب، و مبعد ما الواحد سمعو أكثر من 3 و 4 مرّات، برشة أراء و ردّات فعل اختلفت ..

فيديو الناس الكل تفجعت منّو خاطر لم نعهد بفيديوات مسرّبة لكبار شخصيّات، و لسياسيّين و لوزراء، خاصّة إذا كانوا في الحكم !! أحداث جديدة أول مرّة نعيشوها.. 

شخصيّا تفجعت أوّل ما ريت العنوان : حوار مغلق بين حمّادي الجبالي و الباجي قايد السبسي ! قلت كيف يجتمع رئيس حكومة بخائن و قائد لثورة مضادّة !!

استمعت للفيديو، و لوهلة أحسست و كأنّها خيانة لثورتنا التي استأمنّا عليها وزراءنا (نسيت كل ما كان من تقصير للحكومة و الحاجة الوحيدة الي خممت فيها أنو السيد حمادي الجبالي يتواصل مع الباجي تحت الطاولة)، لكن مبعد اكتشفت إلي الحوار مسجّل منذ ديسمبر 2011، أي منذ وقت تسليم الباجي للسلطة لرئيس الحكومة الحالي، حينها بدرت إلى ذهني العديد من الأسئلة: 

 كيفاش تسجّل الحوار ؟ و متى ؟ هل بعلم من الباجي فقط ؟ هل بعلم من الجبالي و السبسي؟ هل بدون علم السبسي؟ 

كيفاش يخرج حوار مغلق إلى العلن بعد عام تقريبا ؟ كيفاش يخرج حوار مغلق من أصلو ؟؟ شكون خان الأمانة إذا كان هو فعلا مغلق ؟؟ 

بكري شوية كي حكيت في الجزئيات هذه، جاو قالولي شبيك تحكي في القشور و سيّبت و اللب !! يعني الجوسسة و المعاملات الي من النوع هذا أصبحت قشور .. و لذلك سأتجاوز ما أسماه البعض قشور، و نتعدّاو إلى اللب و الجوهر ألا وهو محتوى الحوار : 

الحوار ما فيه شي يــُــعاب عليه رئيس الحكومة، ما فيه شي ضد رئيس الحكومة، في وقت تسليم السلطة عادي جدّا أنّو يتم تواصل بين الإثنين الوزيرين القديم و الجديد، أولا لقلة خبرة الجبالي و ثانيا بروتوكولات معمول بها و عاديّة..

نصائح طلبها الجبالي من السبسي في فترة حساسة جدا و مرحلة انتقالية ما فيها حتّى عيب !!

لمن سيتّهمني بالتبرير، نقلّو ارتاح، إلي يعرفني يعرف إني ما نبرّرش، لكن الموقف واضح و النيّة المبيّتة واضحة ..

الفيديو إذا كان باش يضر راهو باش يضر الباجي، هو صرفاق للبجابيج فقط لا غير، كل المواقف الي دافعو عليها جماعتو طيّحها الباجي في الماء، تبلّت و شربو أيتامو ماءه :)

الباجي حكى على القروي و إلي قال أنّو مدعوم من برّة و اعترف أنو قضية نسمة ممكن تعمل مشكلة و لذلك يجب امتصاص "الغضب"

مجّد في قطر و في أمير قطر و في الكويت و الإمارات و قال إلي علاقاتنا بيها طيّبة، كذلك مجّد في الخليجيين بصفة عامّة ..

حكى على قضيّة البغدادي و اقترح على الجبالي تسليمو الذي كان خائف كثيرا على حرمة البغدادي الجسدية، في حين أنو جماعة الباجي ندبوهم نهار الي تم تسليمو فعليّا و قالو لا يجوز، و خيانة و مانعرش شنوة..

حكى الباجي في مواضيع وضعت البجابيج في موقف محرج.. مواضيع لم أرها قد مسّت من شخص الجبالي، ما عدى موضوع واحد وحيد حزّ في نفسي ألا و هو حديثهم على السيّد منصف بن سالم و تلك الطريقة السيّئة التي تم بها تداول الموضوع ..

النّاس الي قالت أني نحكي في القشور نقلّها هذا رأيي بخصوص الفيديو، فهاتوا ما عندكم ..

هذا التسجيل لا يمكن أن يتعدّى حدود السياسة و تقاليد تسليم السلطة من حكومة لأخرى، خاصّة باعتماد مبدأ "استمرارية الدّولة"، لم أر أي خيانة في ما قيل في الفيديو ..

تسريب الفيديو في هذه الفترة  التي قاطعت فيها النهضة نداء التجمّع بقيادة الباجي، له أسبابه، أهمّها إظهار الحركة بمظهر المنافق الذي يقاطع فيه العدو علنا و يتحالف معه سرّا، أساليب حقيرة لن تنطلي علينا، ننتظر منها المزيد أكيد، فهدفهم الوحيد هو الكراسي و لن يهنأ لهم بال قبل أن ينتصروا في معركتهم، لكن هيهات ..

بي إس : قد يكون هذا الفيديو (عن غير قصد) بمثابة إنذار لأي خائن يريد التحالف مع نداء تونس .. فلن يحكم فينا خائن مهما طال الزمان أو قصر ..

محاولة إحياء فاشلة ..

كل ما نتفكر إلي المجرمين و السفاحين إلي قتّلو و شرّدو العباد، إلي خذاو من حقّ الشّعب و عيّشوه في حالة تشرّد لسنوات و سنوات، سرّاق عاثوا في الدنيا فسادا و نهبوا ثروات الشعب المعنوية قبل المادية، الناس الي نورمالمون بلاصتهم الحبوسات، كل ما نتفكرهم قلبي يوجعني ..

كل ما نتفكر إلي هوما قاعدين يحاولو باش يقودو البلاد، و قاعدين يحكيو باسم الثورة و عاملين فيها ثورجيين، يحبو يقنعونا ببياض ملفّاتهم و بقطعهم مع الماضي، نساو إلي أحنا نراو فيهم ماضينا الأليم، كل ما نتفكرهم قلبي يوجعني ..

نساو إلي حضورهم في الإجتماعات و رؤيتهم في التلافز يوميا يفكّرنا بعهد خلى، ماشي في بالهم الي العهد هذا ينجم يرجع، لكنّه عهد مضى و لن يعود إلا على جثثنا ..

في بالهم كيف يكوّنوا أحزاب عاملة روحها تحكي باسم الثورة، باش نصدّقوهم و نعطيوهم الفرصة و نصفّقولهم و نراو فيهم روح البطولة، و نساو إلّي المؤمن لا يلدغ من جحر مرتين.. 

إلي كان يوما ما عدوّا و قاتلا و سفّاحا و مجرما مستحيل يكون اليوم وصي عليّا، مستحيل نأمّنوا على مستقبل أطفالنا .. خاطر الخائن و العميل، الخيانة بالنسبة ليه أصبحت قوت يومي، الخيانة و الطمع و الجشع هي مبادؤه إلّي تربّى عليها مستحيل يبدّلها في ليلة و نهار ..

أولئك الذين كانوا يحسبون أنفسهم أسيادا، وقت الي كانوا مستقويين بكبيرهم الظّالم و يلعقولوا في الصبّاط، اليوم نراووهم في محاولة فاشلة لمواصلة دورهم المزعوم في السّيادة، خاصّة و أنّو سيّدهم خلاهالهم واسعة و عريضة .. 

و إلي يحيّر أكثر أنّو بعض مناضلي الأمس، إلي كانت كل الناس تغزرلهم بعين كبير، مناضلو الأمس إلّي كانو ضحايا هالفئة إلي نحكي عليها، اليوم تحط يدّها في أياديهم، و تحاول "بناء" المجتمع معاهم !!

مناضل الأمس إلّي كان مضطهد و مظلوم و إلي تعذّب من تصرّفات المجرمين، نلقاه اليوم باع دمه و قضيّته بثمن بخس !! بل أنّو أعطى كرامته مقابلا لهذا التّحالف !!!!

محاولة فاشلة لضخّ الدّماء في جسد التجمّع، بالضّبط كمحاولة لإنقاذ ميّت بل و متعفّن .. 

هي محاولات في نظرهم مشروعة طالما أنّه لا يوجد من يقف لهم و يوعّيهم بأنّ "تجمّعهمم" ميّت متعفّن ..

فضيحة الإغتصاب ..

 مازاللنا كان قليلة تربية باش يستقبلها الرئيس في قصرو !!

عشنا وشفنا، أصبحت صاحبة الأخلاق المنحطّة تستقبل في القصور و "تـُـكرّم" !! 
ممكن يكونوا غلطوا أعوان الأمن، موش ممكن بل أكيد غلطوا، لكن غلطتهم هذه خذات منحى آخر من قبل "المجتمع المدني" و أصبح من الواجب "التعاطف" معها !!

القضية حسب رأيي و غير النّاس الكل أقول، أنّو وصلو بيها الجماعة لهدفهم، و هو التعاطف مع الفتاة رغم أنّها غالطة !!
الطفلة في أنصاف الليالي و في مكان خالي، و مبعد يقلك مسكينة !!
طفلة في الليالي مع شاب غريب (و إن كان خطيبها) من الممكن أنها باش تتعرّض لمحاولة هجوم من أي بشر كان، يعني موش غريبة الحكاية !!

قضيّة أو بالأحرى فضيحة عملتها الطفلة، و كمّلوها جماعة "الإسبري بطحة" ..
شكون الطفلة الي عندها كرامة تقبل على روحها فضيحة كيما هذه ؟؟ 
"مغتصبات الحقوق" فعلا هوما الفتيات الي تم اغتصابهنّ و ساكتين على حقوقهن، لا لشيء إلا لأنهم خايفين من الفضايح الي تنجم تصير، و الي صار مع هذه الفتاة خير دليل (و لو أنّها ظاهرة صوتية) ..

قضيّة أصبحت على كل سيرة و على كل لسان، شكون ما حكاش في قضيّة الإغتصاب، شكون ما حكاش في تفاصيل التفاصيل ؟؟ شكون ما سمعش بالحكاية ؟؟ صغار كبار نساء رجال !! 
ثقافة منحطّة منحلّة دخّلوها إلى البيوت و إلى العقول بطريقة غير مباشرة لكنّها نااااااااجحة و بدات تعطي أكلها !
نحكي على روحي، هذه المواضيع لم تكن يوما مطروحة في منزلنا بهذه الوقاحة، اليوم العايلة الكل تقريبا ولات تتناقش فيها !! و لو بـ "الإشارات" !

نتألم كثيرا كيف نسمع ناس تقول : هي و خطيبها فين المشكلة ؟؟ اليوم ولاّ اختلاء الشاب بفتاة ما فيهش مشكلة ؟؟؟
اليوم أصبح من العادي أنو نراو قلّة التربية و انحطاط الأخلاق في الشارع ؟؟؟
على الأقل سابقا الموضوع ماكانش مطروح، و الي يغلط يغلط على روحو، و ما نسمعوش رأي العباد في ذلك النوع من الحوادث و الوقائع !
اليوم كي خذينا حريتنا في التعبير ولينا نعبرو و ندافعو على فساد الأخلاق، و على قلّة التربية ؟؟
هذه الحرية الي دافعوا الأحرار عليها و دفعوا أرواحهم فداء لهم ؟؟

زعمة الشهيد الي سقط في الثورة كان يرضى أنو يرى أختو أو حتى يسمع بيها فقط و هي في وضعية لا أخلاقية ؟؟؟

هذه حرية التعبير ؟؟؟؟؟؟ 

الي باش ينعتني بالمعقدة فليفعل، فإن كان انفتاحي مرتبط بفساد الأخلاق و انحطاط المستويات، فأنا أعترف أني أكبر معقدة ..

تحيّاتي ..

مستعمرون داخليّون ..

منذ البارحة و خبر الفيلم المسيء للرسول منتشر و لا حد حب يتكلّم أو على الأقل "يستنكر" و اليوم دوب ما تمّ الإعتداء على مجموعة صور لحبيب بورقيبة في متحفه، قامت الدنيا و ولاّت مظاهرة أو مسيرة لنصرة "إلههم" بورقيبة، نصرة معبودهم، نصرة رمز من رموز أعداء الإسلام ..

يعتبرون بورقيبة خط أحمر، دفاعهم عليه فاق كل تصوّر !

عندهم قدرة على فدائه بأرواحهم و باستماتة غريبة فعلا أحسدهم عليها !! ماذا لو دافعتم على الإثنين معا ؟؟ دافعوا على زعيمكم و دافعوا على رسولنا !! استنكروا الأمرين !! لكن لا تحسّسونا أنّنا أقلية مسلمة في بلدنا !!

ما ريتهم زعام كان في تحضير اللافتات و في التفنّن فيها، على الخبر تسمع حسّهم، فيسع ما يدوروا و تلقى لافتاتهم و شعاراتهم جاهزة !!

نفاق يتطاير من أعينهم، و سرعة كبيرة في الركوب على الأحداث و استغلالها لصالحهم، ما يفلتوش مناسبة إلا و يسجّلوا حضورهم حتى و إن كانوا كعبتين.. و والله لو كان في شتم بورقيبة مصلحتهم لفعلوا، لكن طبعا ليس لهم بذلك مصلحة ..

ذلك هو حال معارضتنا : فاشلة و حمقاء، لو كانت عنا معارضة "حقيقيّة" لكان حالنا الآن أفضل بكثير ممّا نحن عليه .. 

لكن معارضتنا محترفة التّهريج بامتياز، الواحد عدّو باش يكوّن معارضة داخل الترويكا حتّى يحفّز الحكومة على العمل و "أشباه معارضتنا" يضربوا في النّوم، ما يعرفوا كان ينبّروا و يحطّوا العصا في العجلة ..

برشة ناس، و في رواية أخرى مناضلين، طاحت من عينيّا، كنت نغزرلهم سابقا بعين الإكبار، لكن الثورة أسقطت أقنعتهم و ظهر كل واحد و معدنه و قد علا طرق الحديد تفوح منه رائحة الصّدأ، و لمع الذهب من زوايا أخر ..

معارضة كرتونيّة، أو ربّما مستعمر داخلي كل همّه نيل نصيب من "بلده" تحت أي ظرف من الظّروف و مهما كانت الطّرق ..

لن أمنحكم شرف لقب المعارضة.. بل أنتم "مستعمرون داخليّون" و سنقاومكم بكل ما أوتينا من جهد .. سنكون حاجزا بينكم و بين بلادنا، لن تمرّوا إلاّ على جثثنا ..