إضراب عمّال البديّة

بالله نقطة نحب نعرّج عليها..

إضراب عمّال البلديّة، هذا الحدث إلّي حكات عليه النّاس الكل..

نحب نقول صحّة ليهم الجماعة إلي عندهم عمّال بلديّة مواظبين و يلمّوا الفضلات يوميّا، و بالتّالي فإنّ إضراب العمّال طبعا سيحدث فارقا واضحا و عندهم الحق النّاس تتشكّى كيف يغيب عامل النظافة..

لكن أنا نحب نحكي على ظاهرة نعيشها على الأقل في منطقتي :/

عمّال البلديّة عاملين إضراب بطبيعتهم ! ماعنّاش عمّال بلديّة، أو بالأحرى ساعات و أنا مروّحة نراهم متعدّين في الشارع نطير بالفرحة :'( 

كميون الزبلة (حاشاكم) يبدا معبّي بالفضلات قريب باش يطرشق، و هذا نتيجة طبيعيّة خاطر عامل البلديّة يقعد بالـ 15 يوم ما نراوش وجهو، تاعبين مساكن، كل 15 يوم يلمّو حومة، و الحوم الباقية ما يهمّوش فيها !

و أغرب ما في الأمر أنّو حتّى لمّان الفضلات بالأكتاف يا بوڨلب، مايكفيش يقعدوا أكثر من الجمعة ما نراوش وجوهم، نهار إلي يسهّل عليهم ربّي و يصحو فيهم الضّمير المهني، يتعدّى كميون البلديّة من الحومة الي قدّامنا و الحومة و إلي ورانا خاطر عندهم شكون موجود غاديكا، و أحنا ماعنّاش فينا شكون يعرف عامل بلديّة، يتعدّى و يخلّي حاويات القمامة مكدّسة !!

ما ننكروش إلي أحنا كنّا مع حق الإضراب سابقا، لكن إنتوما زادة ما تنكروش أنّكم كنتم تتقاضون من 80 الى 120 د، و بعد إضراباتكم إلي ساندناها الشعب كامل أصبحتم تتقاضون بين 350 د و420د (حسب ممثلكم النقابي).

فلم هذه الإضرابات الآن ؟؟ ماهي أسبابها ؟؟ و ما أسباب العزوف عن العمل ؟؟ مافمّة حتّى سبب مقنع يعطيكم الحق في الإضراب، فمّة شكون أحق منكم إلّي هوما العاطلين عن العمل، حيث تبيّن للجميع أنّ هذه الفئة من الشعب هي الفئة الأكثر وعيا و إحساسا بالمسؤوليّة من أولئك الذين يتقاضون أجورا..

موش عيب عليكم ؟؟ إلي قاعدين تعملوا فيه موش خيانة للوطن و خيانة للبطّال إلّي يلوّج في 120 د شهرية (الي إنتوما ما رضيتوش بيها) ؟؟ ماكمش باش تحشموا ؟؟

و إنت إلّي تاخو في شهرية و قاعد في الدّار، ما في بالكش إلي إنت عالة على المجتمع ؟؟ كيفك كيف السارق، تسرق في فلوس الشعب إلي كان من المفروض أنّك تقدّملو مقابلها خدمة؟؟

طبعا كلامي موجّه لعمّال البلديّة موش للـ "إتّحاد العام للإضراب" رغم أنّو هو المسؤول على الإضراب، خاطر و الحمد لله لاحظت أنّو مازال عنّا رجال في تونس، فمّا برشة عمّال قعدوا يخدموا و ما تبّعوش هذه "الشرذمة" من الفئة غير الواعية بالخطر و غير مسؤولة بالمرّة، فلو وضعوا مصلحة تونس أمام أعينهم لما فكّروا لوهلة أن يقوموا بمثل هذا الإضراب..

قلت علاه فمّة ناس واعية و ناس هازّتنا للهاوية؟؟ رغم أنّهم الزوز في نفس المجال؟؟

ماذا يفرق عن عامل قرّر أنّو يضرب عن العمل، و عامل قرّر أنّو يقعد خدمة و يساهم في النهوض بالبلاد ؟؟ طبعا الإجابة ساهلة برشة : العقل.. و الحمد لله على نعمة العقل :)