الإعلام الواطي يركب على ملف جرحى الثورة

فيديو تفرّجت فيه اليوم و لن أستطيع أن أمرّ عليه مرور الكرام..

فيديو من انتاج شمس أفلام :
مدّه العرض : 8 دقائق (فيلم قصير يعني)
الموضوع : فيه مرأة تصيح تحب تعويض على كرتوشة في راسها (قالها الطبيب ماعادش باش تتنحى) قتلك تحب أكثر من 3 ملاين، و مجموعة من جرحى الثّورة (الي عطاو من صحّتهم و الناس الكل متعاطفة معاهم) و الي فما برشة استعملوهم كأداة للظهور بوجه المناضل الي يدافع على ملف : جرحى الثورة.. يعني بمنطق آخر : الركوب على ملف جرحى الثورة.. هذا بالإضافة إلى مجموعة من الأمن الي طلبوا من المرأة الي حكينا عليها من الأوّل أنّها تغادر المكان..
طبعا مع احتجاج بعض من الجرحى على المبلغ الي هو 3 ملاين، الي موش مساعدهم و يحبوا على أكثر.. وسط احتجاجات و شعارات : و خبز و ماء و الجبالي لا (حسب ما نتذكّر) و الجبالي و ديلو DEGAGE !!! خاطر الجبالي و ديلو هوما الإشاعة الي قال عليهم السبسي..

أوّلا باش نوضّح حاجة، نعرف الي برشة ناس باش تتهم اسلوبي في الحديث و كأنّه تهكّم على الجرحى و لذلك من توّة نقلّك : من غير مزايدة يا جماعة، و كل واحد يعرف حدوده، و ملف جرحى الثورة هو قضية تونسية لا مجال للشك في هذا، و ما فماش شكون عطا قيمة للجرحى قد الحكومة هذه من قبل حتى ما تتشكل، نبداوها من الرئيس (الي معاهد نفسو) و أحنا ماشين..

ثانيا بالله نحب سؤال لو يسمحولي الجرحى ياخي واعين بمطالبكم ؟؟ واعين بما تقومون به الآن في هذه الفترة الحسّاسة ؟؟ راكم قاعدين تلعبو على وتر زعزعة الأمن و إدخال الدولة في متاهات عميقة ما عندهاش مخرج !! احترمناكم و لا زلنا نحترمكم و نبارك لكم تضحياتكم الجسام، كيما انتوما تم مسكم في صحتكم فمة ناس أخرى استشهدت و تركت وراءها مآسي تعاني، دافعنا على قضيتكم و سندافع عليها إلى آخر رمق، و لكن شريطة أن تحافظوا على ما عهدناكم به من تحلّ بالصّبر..

فمّة حالات من جرحى الثّورة على الحكومة التدخّل فيها عاجلا و ليس آجلا (هناك بعض الاجراءات تمّ اتخاذها).. فالإصابات درجات و أنت يا سيّدتي إذا كان الطبيب قالك الكرتوشة ما تتنحاش فمالمطلوب من الحكومة ؟؟ أنّها تعطيك منحة شهرية على الكرتوشة ؟؟ يعني شهرية ليك و شهرية للكرتوشة ؟؟

شويّة لوجيك يعيّشكم، و شنية حكاية 3 ملايين الي موش مكفيتكم !! والله موش عارفة نبكي ولا نضحك، ياخي الدولة عندها فلوس و عندها ميزانية باش تعطي كل واحد فيكم أكثر من 3 ملايين؟؟ ياخي علاه الأنانية هذه الكل ؟ انتوما طالبو بالزيادة في المبلغ، و البطال قاعد يطالب بخدمة و العايلات المعوزة تطالب بمنح، و عايلات أخرى تطالب بمنازل تأويها كأيّها النّاس، هذا من ناحية، و من ناحية أخرى المصانع كل مرّة يسكّرلنا مصنع أو خلينا نسميّه قوّة من قوّات الجمهورية التونسيّة، اعتصامات في كل مكان، بنية تحتية لا أراك الله، مستثمرين أجانب يطالبوا بالاستقرار حتى يتمكنوا من الاستثمار..

ياخي هي الحكومة قدّاه عندها ملي تشكلت ؟ عندها جمعتين ملي تشكلت، و بررررررشة بيبان محلولة تستنّى في من يغلقها.. باب القضاء، باب التشغيل، باب المحاسبة، باب جرحى و شهداء الثورة، باب الاعتصامات، باب منوبة (الي هذاكا وحدو باب)، باب الأمن غير المستتب.. و خاصّة الأمن هذا !! الي ماعادش عارفين كيفاه نتصرفوا قداموا و هو ماعادش عارف يتصرّف قدّامنا، الأمن و النقطة السوداء الي قعدت من عمايلو في قلوبنا أحنا التوانسة، الأمن إذا كان تواجد و عمل ردّة فعل نقولوا : آآآآآآآآآآه هاو يعنّف فينا و إذا كان غاب تولّي العباد الكل تطالب بالأمن و بعودته إلى المراكز (فمة جماعة حاضرة باش تقلي ديراكت خاطر العريض في الوزارة ولّيت هكّا تحكي ؟ مانيش ندافع على الأمن لكن سؤال محيرني كيما هو محيّر برشة عباد)..

كلامي موش خوف على الحكومة خاطر الحكومة تعرف كيفاه تدافع على روحها مانيش ناطق باسمها، لكن كلامي نابع من تصرفات غير مسؤولة نراو فيها يوميا قدّام عينينا، و برشة عباد قاعدة تشوّه في صورتها بطريقة غير مباشرة كيما جرحى الثورة الي قاعد يستعمل فيكم الإعلام الواطي المتواطئ مع شرذمة لا تريد بتونس خيرا، كيما ركبو على الثورة يحبوا يركبو على ظهوركم انتوما (واعظروني في العبارة)، خاطر قاعد يتلعب بيكم و ماكمش حاسين، و في النهاية ما فماش خاسر قدكم انتوما.. مانيش باش نسألكم على سكوتكم على حقوقكم في فترة السبسي حتى لا أضع نفسي في موضع محاسبة أو محاكمة، و لكن نتمنّى تراجعوا رواحكم و لو قليلا..

و ما تخليناش أحنا المعطّلين عن العمل الي الثورة قامت على خاطرنا أحنا المهمّشين و على خاطر الكرامة ولقمة العيش، ما تخليوناش ناقفوا وجها لوجه بعد أن كنّا يدا بيد و يظهرلي تتفكروا وقوف برشة معطلين عن العمل في صفوفكم..

لا تعوّلوا على الإعلام في إيصال أصواتكم، ما فمّاش إعلام تونسي يخدم لله.. كلو بسومو، و أرجو أن تتعالوا و أن تنزّهوا أنفسكم على هذا التشويه و المس من مقدار احترامنا لكم فمطالبكم بزيادة أكثر من 3 ملاين أعتبرها أنانية (واعذروني عن الكلمة)، خاطر فمة اخواتكم من الجرحى أحق منكم بتدخّل سريع، كان حري بكم أن تنقلوا أصواتهم..
لا يعني أنّه سيتمّ غضّ الطرف عنكم لكن هناك أولويات و طالما أنّك يا جريح بإمكانك التحرّك و طالما أنك يا سيّدتي الطبيب قالك موش من الممكن أنا نحيولك الكرتوشة فأرجو أن تلتزمي الصمت و تتركي فرصة لغيرك حتى يتمتّع بما تمتّعت به أنت..

متأكّدة 100% أن الكثير سيأوّل كلامي على أنّه انقلاب ضمني على ملف الشهداء لكني نقلهم، فمّة أولويّات يجب احترامها و كل واحد فينا يعرف حدوده، ليس لأنّك معطّل عن العمل أو أنّك جريح ثورة أو أنّ شهريّتك لا تكفيك سيتمّ الركوب على ظهور "المساكين" الي ساكتة و قاعدة تلاحظ من بعيد لبعيد..

كل واحد فينا يغزر للناس الي أسوأ منّو حالا و يقول الحمد لله..
و الجهود يجب أن تتكاثف من الجميع موش فقط من الحكومة، كل واحد فينا لازم من موقعه يحس بالمسؤولية حكومة و شعبا ما فماش شكون فينا منزّه عن المسؤوليّة..