فيق

الواحد يسكت يسكت و تنطّقوه بالسّيف..


فايسبوك مقلوب و دنيا ماكلة بعضها و فيديوات و تصاور و إنت فاسد و إنت ماكش فاسد، إنت غالط و إنت صحيح، هذه راية العقاب، و هذه راية الخلافة و هذه راية الوطن و هذه راية الإسلام و هذه راية مانعرش شنوّة !!


تي شبيكم يا ناس فيقوا على وضعكم !! فيقوا و نحيوا تلك الخرقة التي وضعتموها أو بالأحرى وضعوهالكم على عينيكم!! 


تي الواحد نطقتوه من جنابو، هذه راية ترفع و هذه راية تنكّس، واحد يبرّر و لاخر يهاجم، واحد مسلم و لاخر كافر، تي فين ماشين و هازينا معاكم ؟؟ 
من الحبّة تبنيو قبّة، و بعد كل واحد يولّي يعطي رايو و كل واحد يحكي دون علم أو دراية !! أنا لا أدّعي أنّي أملك الحقيقة كاملة و لن أستطيع أن أملك و لو جزءا منها أمام هذا الكم الهائل من المشاكل و من التشكيك في عقائدنا من ناحية و من "فساد" العقيدة الفعلي من ناحية أخرى !


حكاية النقاب و تفاهمنا فيها كونه حرية شخصية و تقريبا باش ما نحكيش باسم الشعب بأكمله (و أنا أصلا ماعنديش الحق نحكي باسمهم)، الكلنا موافقين على أنّو النقاب يدخل من باب الحريات و الحمد لله برشة ناس لقات حريتها بالنقاب و برشة معاهد و كليات تقري و الأكثر من هذاكا برشة لقاو حل في مشكلة المنقبات و الكشف عن هوياتهم باستعمال آلات تكشف البصمة !! 


و لكن الظاهر انو منوبة مازال ماوصلهاش التطور و مازالت ما تعرش هذه الأساليب الحديثة..
مازال ماعندهاش التقنيات اللازمة و الامكانيات الكافية باش تعمل كيما عملت أختها في برج السدرية..
أو ربّما منوبة موش تابعة الجمهورية التونسيّة لذلك فإنّ بعض الكليات يلقاو حلول و البعض الآخر ما يلقاش، أو بالأحرى ما يحبش يلقى لغاية في نفس يعقوب !؟؟


حل للنقاب موجود و لكن ما يصير في كلية منوبة لا يمكن أن يكون اعتباطيا، مشكلة خلقوها من حيط، مشكلة افتعلوها و خذات صدى أكثر من حجمها، مشكلة دخلت البلاد في حيط و دخلونا أحنا معاهم في حيط الله يهلك إلي كان السبب و الي كانت نواياه سيّئة (معناتها دعائي على الي نواياه سيّئة باش ما يتّهمني حد إلّي أنا دعيت على المنقّبات أو على غيرهم) و عملو منها حكاية و طاولة و أربعة كراسي، و الي ما يلقى ما يحكي يجبد الموضوع هذا و يولي يفتي وحدو و يحلّل و يحرّم و أحكام و أفعال ما أنزل بها من سلطان..


و اليوم آخر ما صدر : اسمع يلّي ما سمعتش:
راية تونس نــُــكّست ! 
راية العقاب رفعت ! 
الوطن فوق كل شيء ! 
الدّين فوق كلّ شيء ! 
الللللللللللللللللوطن !!
الللللللللللللللللللدين !!


آآآآآآآآآآآآآآآآآآآآآآآآآع يا توانسة راكم باش تهبّلونا، راكم أنا شخصيّا دخّلتوني في حيــــــــــط !
إنت يلي تحكي على الوطنيّة، بالله عليك الوطنيّة من وقتاه تعرف الوطنيّة ؟؟ موش إنتوما أوّل ناس ساندتو إضراب عمّال البلديّة ؟؟ موش إنتوما أوّل ناس ساهمتوا في نشر الأوساخ في البلاد و عملتو فيها مناضلين ؟؟ عمّال البلديّة الذين أضربوا 3 أيّام أو أكثر فملأت الأوساخ كل المناطق إلاّ تلك التي ساهم فيها شبابنا الواعي و قام بحملات تنظيف شاملة؟؟ ولا النظافة موش تابعة الوطنيّة ؟؟


موش إنتوما نفس النّاس إلّي تحكيو بالفغونسي و دفنتو لغتنا الأم الي هي العربية ؟؟ و لا اللغة موش وطنيّة !


موش انتوما الي سخرتو من تحية العلم لسنوات و في آخر المطاف نحّالنا المخلوع تحيّة العلم و استبدلها بكلمات جوفاء تقال في بداية كل حصّة، كلمات 99% من المدرّسين موش مستعرفين بيها و يدخل ديراكت يقرّي، و بالتالي فإن تحيّة العلم كان قد تمّ وأدها تمآآآآآآآاما، وينكم وقتها ؟؟ شبيكم ما حكيتوش و شبيكم ما ناقشتوش، ولا تحيّة العلم موش وطنيّة ؟؟


و الآذان الي سكتّوه في جوامعنا موش وطنيّة هذاكا ؟؟


و إنت يا من تنزع علم تونس من فوق مؤسّسة تربويّة ! 
ألم تكن يوما ما مقموعا في دينك و في لباسك و في عقيدتك و في أداء صلاتك و حتّى في وجهك (إعفاء اللحية) ؟ 


أ لم تكن يوما ما في غياهب السجون رأيت من تعذيب و من ظلم و قمع وووو ما تتمزّق له الأفئدة !! 


ألم تكن جريمتك يوما ما : إرهابا و عنفا، لمجرّد اتّباعك لسنّة الرسول عليه الصلاة و السلام ؟؟


مالا علاه العنف توّة ؟؟ و علاه الهجوم على مكتب العميد بالحجارة ؟؟
أبهذه الطريقة تحبّب الإسلام لأصحاب النفوس الضعيفة ؟؟


هذه هي الطريقة المثلى إلي تراها باش الناس تحب الإسلام و باش تقرّب منك الناس و تلفّهم حولك و تفهّمهم إلي الإسلام هو "سياسة" قبل كل شيء (موش سياسة بمعنى مفهوم السياسة و الأحزاب و إنّما سياسة يعني لطف و لين)؟؟


هكّا نقولو للنّاس إلي تونس مسلمة شاء من شاء و كرخ من كرخ ؟؟ 
برشة باش يقولولي أنو راية العقاب تم رفعها إلى جانب راية الوطن، و لكن الي ثبّت في الفيديو يرا أنو العلم تم نزعه (شئنا أم أبينا)..
ما يهمنيش في شكون جا قبل الدجاجة ولا العظمة و مانيش ناقش في مشكلة رفع العلم من عدمه و مانيش ندافع على "الوطنيين" أو على "المسلمين" و لكني ناقش في الحركة في حد ذاتها، الظاهر أنو السيد هذاكا المسمّي روحو عميد كلّية و الجماعة الي موجودين غاديكا عجبتهم الحكاية و موش ناوين يفضّوها على خير، المشكلة في تفاقم و عمّال تزيد، و خذات منحى آخر مختلف تماما..
مانحب حد يزايد عليا لا في وطنيّتي و لا في إسلامي و إلي باش يزايد من غير ما يعلّق، سمّيوها ديكتاتورية سمّيوها كتم للأصوات سمّيوها قمع للحرية سميوها الي تحبو، لكني لن أسمح لأحد أن يشكّك لا في عقيدتي و لا في وطنيّتي..
إلي عملوه في الكلية عآآآآر عآآر، الإسلام شآآآآمخا رغم كيد الأعداء و الحاقدين على الدين لن نسمح لأصحاب النفوس المريضة أيّ هجوم عليه أو مس لعقائدنا، و علم بلادنا شآآمخا مرفرفا في سماء بلادنا لا يحق لكائن من كان أن ينكّسه أو يرفعه من مكانه.
لست من بين أولئك الذين يعتمدون مبدأ : الدين في القلب، فكما قيل : الإيمان قلبا و قالبا، وجب علينا نشره متى سنحت لنا الفرصة، و حينما أقول نشره فأنا واعية بما أقوله، فبلادنا فعلا تحتاج لنشر إسلام، للأسف الكثير و أنا من بين الكثيرين نحتاج لإعادة تأهيل لكل معتقداتنا، صحيح عنّا القاعدة الصحيحة فنحن مسلمون بالفطرة لكنّنا نحتاج إلى تكوين فعلي في "المجال الديني" للأسف..
لكن نشر الإسلام موش بهذه الكيفيّة الهزلية و كأنّنا و سامحوني في العبارة طالعين للقمرة و حطينا علم على سطحه، إسلامنا موش بهذه الطريقة و مستحيل يكون بهذه الطريقة المرعبة و كأنّو استعمار أو احتلال أو ما شابه ذلك، أحنا كما قلنا مسلمين بالفطرة و برشة مفاهيم دخلت بعضها عنا و ذلك عن جهل..


للأسف الأعمال التي يقوم بها إخوتنا في الكلية تجعل من العميد ضحيّة أمام الجميع، فلا أظن أنّو هناك من سيسمح بالمس من سيادة الوطن، و ستخدم هذه الحركة أعداء الإسلام لأنها ستساهم كالعادة في فرقتنا و برشة ناس باش يجيو مع الحركة بدعوة أنّ الإسلام قادم ( والي هو قادم رغم كيد الأعداء) و بين من لا يرضى أن تنكّس راية الوطن (إلي أنا شخصيا ما نرضاهاش)..


تخيّلوا لو قام بهذه الحركة غريب ليس منّا فهل سنرضاها ؟؟ أكيد لا..


أنا لا أطالب بفصل الدين عن الوطن، فالوطن مسلم و لن يستسلم، و لكني أطالب بفصل هذه النزاعات المفتعلة التي لا تزيدنا إلا فرقة..
هي خطة محكمة التخطيط و التنفيذ، ينفّدها أعداء الدين و الوطن غايتها تفرقة المسلمين فقط لا غير، و ها قد نجحوا في ذلك فعلا..
نهضاويين تحريريين سلفيين كلنا مسلمون، علينا وجوبا موش مزيّة منا الوقوف جنبا لجنب : الوطن مسلم و لن يستسلم، إلي باش يزايد علينا أو يشكّك في ديننا أو في وطنيّتنا أكيد له أغراض من وراء ذلك..
أرجو من الجميع تحكيم العقل، قبل كل شيء، الوقوف فقط للحظات أمام ما يصير الآن في منّوبة من مشاكل مفتعلة من الطرفين و أقولها و أتحمّل مسؤوليّتي، و لا اقصد بكلامي لا فتنة و لا تحريضا و لكن لفتا للإنتباه لإخوتنا الذين قد يكونون عن غير قصد ضحيّة لمخطّطات بإذن الله فاشلة يريدون من ورائها ضرب التونسيّين في أغلى ما عندهم : دينهم و وطنيّتهم..


أرجو من الجميع تحكيم عقلهم أعيدها و أكرّرها..


ما حدث اليوم ليس من فراغ إنّما هو محكم التدبير و نجحوا في إنفاذه كل الأطراف و إن كانت بعض الأطراف قد تورّطت عن غير قصد في هذه المشاكل الواهية التي لا تزيدنا إلا فرقة، أرجو اللجوء إلى ذواتكم فما اقترفه إخوتنا اليوم في منوبة يـُـحسب عليهم لا لهم، و عميد الكلية قد ظهر في ثوب الحمل الوديع أو الضحية المغلوب على أمرها..


ما حدث اليوم عاااااااااااااااااااااار عاااار..
فما فعلتموه طيلة شهور قد ينقلب عليكم اليوم (و اعذروني على تشاؤمي)..


سلام ..